دۆناڵد ترەمپ: لەبارەی گرینلاند ڕێککەوتنێکی گرنگ لەگەڵ ئەوروپا دەکەین

ئاڤا نیوز

دۆناڵد ترەمپ، سەرۆکی ئەمریکا ئاشكرای دەکات، دانوستانەکان لەسەر گرینلاند دەستیپێکردووە و دەڵێت: ڕێککەوتنێکی باش لە ڕوانگەی ئاسایشی نیشتیمانییەوە لە نێوان واشنتن و ئەوروپا دەکرێت بەڵام دانیمارک ڕێککەوتن ڕەت دەکاتەوە. 

لێدوانی فەرمی: دۆناڵد ترەمپ، سەرۆکی ئەمریکا لە وەڵامی پرسیاری ڕۆژنامەنووسان لەبارەی  گرینلاند و پەیوەندی لەگەڵ سەرکردەکانی ئەوروپا دەڵێت: "دانوستانەکان دەسیتیپێکردووە و پێموایە گرێبەستێکی باش و گرنگ دەبێت بۆ هەمووان، لە ڕوانگەی ئاسایشی نیشتمانییەوە ئەم ڕێککەوتنە زۆر گرنگ و پێویستە."

دۆناڵد ترەمپ، وتیشی: "لەسەر چەندین پرس کۆدەنگی هەبووە و ئەوروپاش دەیەوێت ئەمریکا ڕێککەوتنێک ئەنجام بدات."

زانیاریی زیاتر: سەرۆکی ئەمریکا، بۆ بەدەستهێنانی دوورگەی گرینلاند هەڕەشەی سەپاندنی باجی لە بەڕێژەی %10 بەسەر وڵاتانی ئەوروپا دەرکرد، ئەگەر لە دژی بڕیارەکانی بووەستنەوە، بەڵام دواتر بڕیارەکەی هەڵوەشاندەیەوە و جەختی لەوە کردەوە کە ڕێککەوتن ئەنجام دەدات.

لەلایەکی دیکەوە: ترەمپ، لەگەڵ مارک ڕووتە، سکرتێری گشتیی ناتۆ کۆبوویەوە و هێڵکارییەکی بۆ ڕێککەوتنێک کرد، بەگوێرەی ڕەشنووسی ڕێکەوتنەکە، پاراستنی سەروەری دانیمارک بەسەر گرینلاند و نوێکردنەوەی مەرجەکانی ڕێککەوتنی ساڵی 1951 سەبارەت بە بەرگریی دوورگەکە دیاری کراوە.

بۆچی گرنگە: ئەم ڕێککەوتنە ڕێگە بە ئەمریکا دەدات بنکەی سەربازی و "ناوچەی بەرگری" لە دوورگەی گرینلاند دابمەزرێنێت بەڵام پێویستە ناتۆ ڕەزامەندی پیشان بدات. 

کاردانەوەکان: لە کاردانەوەی ئەم پێشنیازەدا، مێت فرێدریکسن، سەرۆکوەزیرانی دانیمارک ڕایگەیاند: سکرتێری گشتیی ناتۆ، مارک ڕووتە، هیچ دەسەڵاتێکی نییە بۆ ئەنجامدانی ئەو جۆرە دانوستانانە بەناوی دانیمارکەوە و ڕەتی کردەوە ڕێککەوتنێکی لەم شێوەیە لەلایەن وڵاتەکەی قەبووڵ کرابێت.