د. موسەننا ئەمین: هەیبەت و شکۆ بۆ پۆستی سەرۆککۆمار دەگەڕێنینەوە

ئاڤا نیوز

د. موسەننا ئەمین، سەرۆک فراکسیۆنی یەکگرتوو لە پەرلەمانی عێراق و کاندید بۆ پۆستی سەرۆککۆمار بە ئاڤای ڕاگەیاند: "ئامادەنین لە کاندیدبوون بکشێینەوە، لەگەڵ ئەوەش نین چی دیکە هەڵبژاردنی سەرۆکایەتی کۆمار دوابخرێت."

چیرۆکی سەرەکی: هەڵبژاردنی پۆستی سەرۆککۆماری عێراق نزیک دەبێتەوە، د. موسەننا ئەمین، کاندید بۆ پۆستی سەرۆککۆمارم بڕیاریداوە لە پرۆسەکە نەکشێتەوە و ڕەخنەی توندیش لە بێهەڵوێستیی و ناکارایی پۆستی سەرۆککۆمار دەگرێت و دەڵێت: "لە کاتێکدا هەرێمی کوردستان و بەغدا ڕووبەڕووی دەیان قەیران بووتەوە، هیچ هەڵوێستێکی کردەیی لە سەرۆکایەتی کۆمار نەبینراوە."

لێدوانی فەرمی: د. موسەننا ئەمین، سەبارەت بە پۆستی سەرۆکۆمار بە ئاڤای وت: "ئێمە دەیان کێشەمان هەبووە لەوانە دۆسیەی نەوت، نەناردنی مووچە و شایستە داراییەکان، پرسی خاک و ماددەی 140 بەڵام هیچ هەڵوێستێکی کردەیی لە سەرۆکایەتی کۆمار نەبینراوە. تەنانەت لە ڕووداوەکانی 16ـی ئۆکتۆبەردا، سەرەڕای ئاوارەبوونی دەيان هەزار کەس لە کەرکووک، سەرۆککۆمار ئامادە نەبوو ڕاگەیەندراوێک بڵاوبکاتەوە و جەخت لە نادەستووریبوونی بەکارهێنانی هێز لە کێشە ناوخۆییەکان بکاتەوە."

کاندیدەکەی پۆستی سەرۆککۆمار، دەشڵێت: کار لەسەر گێڕانەوەی هەیبەت و پێگەی سیاسی بۆ پۆستی سەرۆککۆماری عێراق دەکەین، کە بەهۆی بێدەنگی و سستییەوە کاریگەرییەکەی لەدەستداوە."

٠ پۆستی سەرۆککۆمار پێویستە وەکو پۆستێکی دەوڵەت سەیر بکرێت، چونکە پارێزەری دەستوورە و پێگەی هەموو دەوڵەتە و نوێنەرایەتی عێراق دەکات."

٠ ئەم هەنگاوە لە ڕێگەی کاراکردنی ئەدایەکی سیاسی و ڕۆڵی سەرۆکایەتی لە ناردنی پڕۆژەیاسا بۆ پەرلەمان و گرتنەبەری دیپلۆماسیەتێکی بەهێز لەگەڵ وڵاتانی ناوچەکە و جیهان دەبێت.

٠ لە زۆربەی ڕووداوەکانی ڕابردوو و بابەتە چارەنووسسازەکان، سەرۆککۆمار بێهەڵوێستی و بێدەنگی هەڵبژاردووە.