ئێران سوپای وڵاتانی ئەوروپای وەک گرووپی "تیرۆرست"ـی ناساند

ئاڤا نیوز 

محەممەد باقر قالیباف، سەرۆکی پەرلەمانی ئێران ڕایگەیاند، کۆماری ئیسلامیی سوپای وڵاتانی ئەوروپا وەک "گرووپی تیرۆریست"ـی دەناسێنێت.

وێنە گەورەکە: ئەم هەنگاوەی پەرلەمانی ئێران لەکاتێکدایە ڕۆژی پێنجشەممە یەکێتیی ئەورووپا سوپای پاسدارانی وەک تیرۆست ناساند.

لێدوانی فەرمی: محەممەد باقر قالیباف، سەرۆکی پەرلەمانی ئێران لەبارەی بڕیارەکەوە ڕایگەیاند: لەمەودوا سوپای وڵاتانی ئەوروپا لە ڕوانگەی ئێرانەوە وەک ڕێکخراوی تیرۆریستی مامەڵەیان لەگەڵ دەکرێت و بەرپرسیارێتی هەر لێکەوتەیەکی ئەم بڕیارە لە ئەستۆی یەکێتیی ئەوروپایە.

-ئەوروپا "تەقەی لە پێی خۆی کردووە"، چونکە سوپای پاسداران گەورەترین بەربەست بووە لەبەردەم گەیشتنی تیرۆر بۆ ناو جەرگەی ئەورووپا.

- قالیباف هەنگاوەکەی یەکێتیی ئەوروپای بە پەیڕەوکردنی فەرمانی ئەمریکا و ئیسرائیل ناوبرد و پێی وایە ئەمە دەبێتە هۆی بێبایەخبوونی زیاتری پێگەی ئەوروپا و تێکچوونی هاوسەنگییە ئەمنییەکان کە پێشتر سوپا ڕۆڵی تێدا دەگێڕا.

لەلایەکی دیکەوە: بەگوێرەی میدیای ئێران ئەمڕۆ لە کاردانەوەی ناساندنی فەیلەقی سوپای پاسداران لەلایەن یەکێتیی ئەورووپاوە وەک ڕێکخراوێکی تیرۆریستی، ئەندامانی پەرلەمانی ئێران بە جلوبەرگی سوپای پاسدارانەوە لە پەرلەمان دەرکەوتن بۆ دەربڕینی پشتیوانی خۆیان بۆ ئەو دامەزراوە سەربازییە.