ئافرەتێکی دووگیان لەکاتی کارکردن گیان لە دەستدەدات

ئاڤا نیوز

لە شارەزوور، ئافرەتێکی دووگیان، لەکاتی کارکردنی لە کارگەیەکی ئاو کەتووەتە خوارەوە و گیانی لەدەست دا و لێکۆڵینەوەش لە ڕووداوەکە بەردەوامە. 

لێدوانی فەرمی: عوسمان زیندانی، سەرۆکی سەندیکای کرێکارانی بیناسازی بە ئاڤای گوت: "ئەمڕۆ لە یەکێک لە کارگەکانی ئاو لە شارەزوور کرێکارێکی ئافرەت بە ناوی 'کیژێ ڕزگار عەبدوڵڵا' تەمەن 30 ساڵ کە دووگیان بووە، لەکاتی کارکردن لە شوێنێکی بەرزی کارگەکە کەوتووەتە خوارەوە و گیانی لەدەستداوە."

لە لایەکی دیکەوە: سامان سابر، بەرپرسی هۆبەی فریاکەوتنی نەخۆشخانەی گشتیی شەهید ڕەئوف بەگ لە شارەزوور، بە ئاڤای گوت: "ئافرەتێک گەیەنرایە نەخۆشخانەکەمان، لە حاڵەتێکی مەترسیداربوو، هەرچەندە هێشتا گیانی لەدەستنەدابوو، بەڵام زەبرێکی توندی بەر قەفەزەی سنگی کەوتبوو، دەستبەجێ هەموو هەوڵێکماندا چارەسەری بۆ بکەین بەڵام بەداخەوە دوای پێنج خولەک لە گەیشتنی بە نەخۆشخانە گیانی لەدەستدا."

بەرپرسی هۆبەی فریاکەوتنی نەخۆشخانەی گشتیی شەهید ڕەئوف بەگ، دەشڵێت: "تەرمەکەی ڕەوانەی پزیشکی دادی سلێمانی کراوە."

زانیاریی زیاتر: بەگوتەی سەرۆکی سەندیکای کرێکارانی بیناسازی، لەسەر ئەو ڕووداوە لەگەڵ قایمقامیەتی قەزای شارەزوور لەسەر هێڵن بۆ ئەوەی لێکۆڵینەوە لە ڕووداوەکە بکرێت و بەگوتەی کەسوکاری ئافرەتەکەش، "ئەو ئافرەتە دووگیان بوو ، بەڕۆژووش بووە."