ئاسایشی ناوخۆ دەچێتە حەسەکە و قامیشلۆ بەهۆیەوە قەدەغەی هاتووچۆ ڕادەگەیەنرێت

ئاڤا نیوز

سبەی دووشەممە لە چوارچێوەی ڕێککەوتنی هەسەدە و حکومەتی سووریا، یەکەم کاروانی ئاسایشی ناوخۆی دیمەشق دەچنە ناو شارە کوردییەکان و قەدەغەی گشتیی هاتووچۆ ڕادەگەیێنرێت.

چیرۆکی سەرەکی: بەپێی ڕێککەوتنەکەی نێوان سوپای سووریا دیموکرات "هەسەدە" و حکومەتی سووریا، سبەی دووشەممە 100 کارمەندی ئاسایشی ناوخۆی سووریا لەرێگەی 25 ئۆتۆمبێلەوە دەچنە ناو حەسەکە و قامیشلۆ. هێزەکان تەنها ڕێگەیان پێدراوە چەکی سووک هەڵبگرن و بە هیچ شێوەیەک بۆیان نییە نمایشی سەربازیی یان چالاکیی هاندەرانە ئەنجام بدەن.

زانیاریی تایبەت: بە گوێرەی ئەو زانیارییەی دەست پەیامنێری ئاڤا کەوتووە بۆ ڕێگریکردن لە هەر گرژییەک لەگەڵ هاووڵاتییان، لە کاتژمێر 6:00ـی بەیانییەوە تاوەکو 8:00ـی شەو قەدەغەی گشتیی هاتووچۆ ڕاگەیێنراوە و چوارگۆشەیەکی ئەمنیی تایبەت بۆ پاراستنی هێزە هاتوووەکان دروست دەکرێت تاوەکو بە سەلامەتیی جێگیر ببن و دوور بن لە هەر پەرچەکردارێکی تووندوتیژانە.

ئەوەی پێویستە بیزانیت: زانیارییە تایبەتەکانی ئاڤا مانەوەی ئەم 100 کارمەندە هەمیشەیی نییە و دەبێت لە ماوەی 15 ڕۆژدا شارەکە جێبهێڵن. ئەمە تەنها وەک "هەنگاوێکی سیمبولیی" بۆ سەلماندنی دەسەڵاتی دەوڵەت و دەستپێکردنی پڕۆسەی تێکەڵکردنی دامەزراوەکان ئەنجام دەدرێت.

باکگراوند: دوای چەندین ڕۆژ لە ململانێی سەربازیی و نێوەندگیریی ئەمریکا، هەسەدە و دیمەشق لەسەر گەڕانەوەی دامەزراوەکانی دەوڵەت و یەکخستنی سوپا ڕێککەوتن.