سەرۆک بارزانی و باڵیۆزی ئەمریکا لەسەر بەهێزتركردنی شەراكەتی ئەمریكا و عێراق هاوڕابوون

ئاڤا نیوز

هەڵسووڕێنەری باڵیۆزخانەی ئەمریكا لە عێراق، هەڵوێستی نەگۆڕی وڵاتەكەی بۆ هەرێمی كوردستانێكی بەهێز لەچوارچێوەی عێراقدا بۆ سەرۆک بارزانی دووپاتكردەوە، هاوكات هەردوولا هاوڕابوون لەسەر بەهێزتركردنی شەراكەتی ئەمریكا و عێراق.

چیرۆكی سەرەكی: ئەمڕۆ لە پیرمام، سەرۆک مەسعود بارزانی پێشوازی لە جۆشوا هاریس، هەڵسووڕێنەری باڵیۆزخانەی ئەمریکا لە عێراق و ویندی گرین، کۆنسوڵی گشتی ئەمریکا لە هەرێمی کوردستان کرد.

بڵاوكراوەی فەرمی: لەبارەی دیدارەكە، بارەگای بارزانی ڕاگەیێنراوێكی بڵاوكردووەتەوە، تێیدا هاتووە، هەڵسووڕێنەری باڵیۆزخانەی ئەمریکا بەناوی سەرۆک و حکومەتی ئەمریکا سوپاس و پێزانینی ئاراستەی سەرۆک بارزانی کرد بۆ هەموو ئەو پشتیوانی و پاڵپشتیانەی کە بۆ دوایین ڕێککەوتنی نێوان حکومەتی سووریا و هێزەکانی سووریای دیموکرات كردوویەتی.

لای خۆیەوە، سەرۆک بارزانی، سوپاسی ڕۆل و هەڵوێستی ئەمریکای کرد بۆ پشتیوانییەکانیان بۆ گەلی کوردستان و ئاماژەی بۆ ئەوە کرد، ئەگەر هەڵوێست و پشتیوانیی ئەمریکا نەبووایە لە ساڵی 1991، نەماندەتوانی دەستکەوتەکانی ڕاپەڕین و پەرلەمان و حکومەتی هەرێمی کوردستان بپارێزین.

بابەتە ستراتیژییەكە: لەبارەی پڕۆسەی سیاسیی عێراق، هەڵسووڕێنەری باڵیۆزخانەی ئەمریكا لە عێراق، جارێکی دیکە پاڵپشتی و پشتیوانی و هەڵوێستی نەگۆڕی ئەمریکای بۆ هەرێمی کوردستانی بەهێز لە چوارچێوەی عێراقدا دووپاتکردەوە.

هەردوولا جەختیان لە گرنگیی پابەندبوون بە دەستوور کردەوە و هاوڕابوون کە عێراقییەکان خۆیان بڕیار لە ڕەوشی وڵاتەکەیان بدەن لەسەر بنەمای هاوبەشی و هاوسەنگی و سازان.

هەردوولا پێشوازییان لە گفتوگۆ و ڕاوێژکارییەکانی ئەم دواییەی بەغدا کرد بۆ هێنانەئارای ڕێکار و سیناریۆ سیاسییەکان کە تێیدا بەرژەوەندیی عێراقییەکان ڕەچاو بکرێت و لە هەموو ڕوویەکیشەوە شەراکەتی ئەمریکا و عیراق بەهێزتر بکرێت.

ئەوەی پێویستە بیزانیت: سەردانی شاندی باڵای باڵیۆزخانە و كونسوڵخانەی ئەمریكا بۆ لای سەرۆك بارزانی لەكاتێكدایە، دۆناڵد ترەمپ، سەرۆكی ئەمریكا دژایەتیی كاندیدكردنی نووری مالیكی بۆ پۆستی سەرۆكوەزیران دەربڕی، لەبەرامبەردا لایەنەكانی چوارچێوەی هەماهەنگی ڕژدبوونی خۆیان لەسەر كاندیدكردنی مالیكی دووپات كردەوە.