شاندەکەی چوارچێوەی هەماهەنگی گەیشتە هەولێر

ئاڤا نیوز

شاندی باڵای چوارچێوەی هەماهەنگی بە سەرۆکایەتی سەرۆکوەزیرانی عێراق، گەیشتە هەرێمی کوردستان و بەمەبەستی یەکلاییکردنەوەی پۆستی سەرۆککۆمار لەگەڵ سەرۆک بارزانی و سەرۆکی یەکێتی نیشتیمانی کوردستان کۆدەبێتەوە.

چیرۆکی سەرەکی: پێش نیوەڕۆی ئەمڕۆ دووشەممە محەممەد شیاع سوودانی سەرۆکوەزیران بە سەرۆکایەتی شاندێکی باڵای چوارچێوەی هەماهەنگی گەیشتە هەرێمی کوردستان، لەلایەن سەرۆکوەزیران مەسرور بارزانی پێشوازی کرا.

زانیاریی زیاتر: شاندە باڵاکەی چوارچێوەی هەماهەنگی پێکهاتوون لە محەممەد شیاع سوودانی، سەرۆکوەزیرانی عێراق، هادی عامری، ئەمینداری ڕێکخراوی بەدر و موحسین مەندەلاوی، سەرۆکی هاوپەیمانی ئەساس، عەباس عامری ئەمینداری گشتیی چوارچێوەی هەماهەنگیش یاوەری شاندەکەیە.

زانیاریی پەیامنێر: هیشام سەعید، پەیامنێری ئاڤا لە هەولێر ڕایگەیاند، شاندە باڵاکەی چوارچێوەی هەماهەنگی، لەلایەن سەرۆکوەزیران مەسرور بارزانی، ڕێبەر ئەحمەد وەزیری ناوخۆ، ئومێد خۆشناو، پارێزگاری هەولێر، نەوزاد هادی و پشتیوان سادق ئەندامانی مەکتەبی سیاسیی پارتی دیموکراتی کوردستانەوە پێشوازییان لێکراوە.

لەبارەی ئامانجی سەردانەکەش عەباس عامری، ئەمینداری گشتیی چوارچێوەی هەماهەنگی ئاشکرای کرد کە، ئامانجی سەردانەکە بۆ دروستکردنی لێکتێگەیشتنە لەنێوان پارتی و یەکێتی بۆ یەکلاییکردنەوەی دۆسیەی سەرۆکایەتی کۆماری عێراق.