دوای هەڕەشەکانی ئەمریکا مەکسیک هاوکاری کوبا دەکات

ئاڤا نیوز

دوای ئەوەی کوبا لە لایەن ئەمریکاوە گوشاری ئابووری زیاتری خرایە سەر، مەکسیک بڕیاریداوە هاوکاریی مرۆیی و تەکنیکی بنێرێت بۆ ئەو وڵاتە.

وێنە گەورەکە: سەرەڕای ئەوەی ئەمریکا هۆشداری دایە مەکسیک بەوەی هاوکاری کوبا نەکات، بەڵام سەرۆکی نوێی مەکسیک بڕیاری داوە لە ڕێگەی کۆمپانیای فیدراڵی کارەبا (CFE) هاوکاری کوبا بکات و بڕێک لە کێشەکانی وزەی چارەسەر بکات.

لێدوانی فەرمی: کلاودیا شاینباوم، سەرۆکی نوێی مەکسیک، ڕایگەیاند، وڵاتەکەی هاوکاری مرۆیی و تەکنیکی دەنێرێت بۆ کوبا، ئەمەش وەک وەڵامدانەوەیەک بۆ ئەو قەیرانانەی پەیوەست بە وزە و کارەبا و ئەو وڵاتەی گرتووەتەوە.

زانیاریی زیاتر: شاینباوم، پێشتریش بە ئەمریکییەکانی ڕاگەیاندبوو، نابێت بەو جۆرە گوشاری دارایی و ئابووری لەسەر کوبا دروستبکرێت، چونکە بەو شێوەیە تەنیا خەڵکی کوبا زەرەرمەند دەبن، هەروەها ئامادەیی وڵاتەکەی بۆ نێوەندگیری لە نێوان هاڤانا و واشنتن دەربڕی. 

ئەم هەنگاوەی شاینباوم درێژەپێدەری سیاسەتەکانی سەرۆکی پێشوو لۆپێز ئۆبرادۆرە، کە پەیوەندییەکی نزیکی لەگەڵ حکومەتی هاڤانا هەبوو و دژی گەمارۆکانی سەر ئەو وڵاتە بوو.

ئەوەی پێویستە بیزانیت: کوبا، لە ڕووی بەدەستهێنانی وزەوە پشت بە وزەی بە ڤەنزوێلا، مەکسیک و چین دەبەستێت، بەڵام دوای ئەوەی ئەمریکا نیکۆلاس مادورۆی سەرۆکی ڤەنزوێلای لە پۆستەکەی دوورخستەوە و دەستی بەسەر نەوتی ئەو وڵاتەدا گرت، هەناردەکردنی نەوتی بۆ کوبا ڕاگرت و باجی گومرگی زیاتری خستە سەر ئەو وڵاتانەی کە نەوت و سەرچاوەکانی وزە بۆ کوبا هەناردە دەکەن.