هەنگاوەکانی ئامادەکردنی 120 ملیار داهاتی ناوخۆ دەستیان پێ کرد

ئاڤا نیوز

وەزارەتی دارایی و ئابووری هەرێمی کوردستان، هەنگاوەکانی ئامادەکردنی 120 ملیار دینار داهاتی ناوخۆ دەست پێ کردووە، چاوەڕێی بڕیاری وەزارەتی دارایی عێراقن بۆ ئەوەی داهاتی نانەوتی مانگی یەک بنێرن و مووچە خەرج بکرێت، داهاتی نانەوتی سنووری سلێمانی ئامادەیە و چاوەڕێی نووسراوی وەزارەتی دارایین.

ئەوەی پێویستە بیزانیت: لە مانگەکانی پێشوودا، حکومەتی عێراق دوای دابەشکردنی مووچەی چەند وەزارەتێکی خۆی، مووچەی فەرمانبەرانی هەرێمی کوردستانی خەرج کردووە، چەند ڕۆژێکە دابەشکردنی مووچە لە عێراق دەستیپێکردووە، بەڵام تاوەکو ئێستا وەزارەتی دارایی عێراق بڕیاری خەرجکردنی مووچەی مانگی یەکی مووچەخۆرانی هەرێمی کوردستانی نەداوە.

لێدوانی فەرمی: سەرچاوەیەک لە بانکی ناوەندیی هەرێم،  سلێمانی؛ بە ئاڤای گوت، "48 ملیار داهاتی نانەوتی سلێمانی ئامادەیە، چاوەڕێی ئاگادارکردنەوەی وەزارەتی دارایین بۆ ئەوەی پارەکەیان بۆ بنێرێن و هێشتا ئاگادارکردنەوەکەمان بەدەست نەگەیشتووە، بەڵام بە ئەگەری زۆرەوە ئەم هەفتەیە داهاتی ناوخۆ دەنێرین."

زانیاریی زیاتر: وەزارەتی دارایی و ئابووری هەرێمی کوردستان، هەفتەی ڕابردوو لە ڕێگەی تیمێکەوە لیستی مووچەی مانگی یەکی ڕەوانەی بەغدا کرد، بەگوتەی سەرچاوەیەک لە نێو وەزارەتی دارایی هەرێمی کوردستان، تیمەکە گەڕاونەتەوە هەولێر و لەوەزارەتی دارایی عێراق وردبینی سەرەتایی بۆ لیستەکە کراوە و ئەو تیمەش ڕوونکردنەوەیان داوە.

لەبارەی  ناردنی  120 ملیار داهاتی ناوخۆ کە یەکێکە لە مەرجەکانی خەرجکردنی مووچە لەلایەن بەغدا، ئێستا وەزارەتی دارایی و ئابووری هەرێمی کوردستان سەرقاڵی ئامادەکردنی داهاتی ناوخۆیە و 72 ملیاری هەولێر و دهۆک، هەروەها 48 ملیاری سلێمانی و هەڵەبجە کۆدەکرێتەوە و بۆ بەغدا دەنێردرێت.