ئیسپانیا بەکارهێنانی تۆڕە کۆمەڵایەتییەکان بۆ تەمەنی خوار 16 ساڵ قەدەغە دەکات

ئاڤا نیوز

ئیسپانیا هەنگاو دەنێت بۆ قەدەغەکردنی تۆڕە کۆمەڵایەتییەکان بۆ مێردمنداڵانی خوار تەمەنی 16 ساڵ؛ ئەوەش وەک هەوڵێک بۆ پاراستنیان لە ناوەڕۆکی زیانبەخش.

لێدوانی فەرمی: پێدرۆ سانچێز، سەرۆکوەزیرانی ئیسپانیا، لە میانی بەشداریکردنی لە لووتکەیەکدا لە دوبەی، ئاماژەی بەوە کرد کە تەنیا "نیشانەکردنی چوارچێوەی تەمەن" بەس نییە، بەڵکو دەبێت پلاتفۆرمەکان سیستەمێکی کارای پشتڕاستکردنەوەی تەمەن دابنێن کە ڕێگریی ڕاستەقینە دروست بکات.

زانیاریی زیاتر: سەرۆکوەزیرانی ئیسپانیا هۆکاری ئەم بڕیارەی بۆ ئەوە گەڕاندەوە کە منداڵان لە تۆڕە کۆمەڵایەتییەکاندا ڕووبەڕووی مەترسییەکانی وەک ئاڵوودەبوون، زیانی دەروونی و هەروەها ناوەڕۆکی تووندوتیژی و پۆرنۆگرافی دەبنەوە.

ئەوەی پێویستە بیزانیت: ئەم هەنگاوەی ئیسپانیا دوای ئوسترالیا دێت کە یەکەم وڵات بوو لە جیهاندا ئەو قەدەغەیەی جێبەجێ کرد؛ ئێستاش وڵاتانی وەک فەرەنسا، پورتوگال، یۆنان و دانیمارک لە هەوڵدان بۆ ئەوەی یاسایەکی هاوشێوە لە سەرانسەری یەکێتیی ئەورووپادا بچەسپێنن.