کتێبی "لۆزان لە چاوی کوردەوە" بەردەست دەبێت

ئاڤا نیوز

نووسەری دیاری کورد، داڤان یەحیا خەلیل، ڕایگەیاند، کتێبی "لۆزان لە چاوی کوردەوە" ئێستا لە جیهاندا بەردەستە و ئەو کتێبە باس لە پرۆسەی دانوستاندنەکانی لۆزان و تێکەڵبوونی بەرژەوەندی زلهێزەکانی ئەوکات و شوێن و ڕۆڵی نەتەوەی کورد دەکات. 

 

چیرۆکی سەرەکی: داڤان یەحیا خەلیل، نووسەری دیاری کورد کە خاوەنی چەند کتێبێک و چەند خەڵاتێکی نێودەوڵەتییشە، لە دوای یەکەم کتێبی بەناونیشانی "کوردستان و کۆمەڵکووژیی و لەدایکبوونەوە"، توانیی لە ساڵی 2015 لە بەریتانیا خەڵاتی باشترین کتێب بباتەوە و ئەمجارەش کتێبێکی نوێی بڵاوکردەوە. 

لێدوانی فەرمی: داڤان یەحیا خەلیل، نووسەر بە ئاڤای وت: "من لەم کتێبە هەوڵم داوە لە ڕێگەی توێژینەوەیەکی مێژووییەوە، پرۆسەی دانوستاندنەکانی لۆزان، تێکەڵبوونی بەرژەوەندی زلهێزەکانی ئەوکات و شوێن و ڕۆڵی نەتەوەی کورد لەو پرۆسەیەدا شی بکەمەوە."

داڤان، دەشڵێت: "لە کۆتاییدا کتێبەکە پرسیارێکی گرنگ دەوروژێنێت، ئەویش ئەوەیە، ئایا مێژووی کوردستان دەتوانرا ڕێچکەیەکی جیاواز بگرێت ئەگەر پەیماننامەی لۆزان پەسەند نەکرابا."

زانیاریی زیاتر: داڤان یەحیا، یەکەم کتێبی بەناونیشانی "کوردستان و کۆمەڵکووژیی و لەدایکبوونەوە" بووە، دواتر "کوردستان لەسەر ڕێگەی سەربەخۆییدا"، کتێبی دووەمیەتی، "چۆن مەسعود بارزانی کوردی برد بۆ سەر لێواری سەربەخۆیی" ناونیشانی کتێبی سێیەمی ئەو نووسەرەیە. هاوکات "لۆزان لە چاوی کوردەوە"، نوێترین کتێبی ئەو نووسەرە کوردەیە.