ئیمارات دەبێتە هاوبەشی کۆمپانیاکەی ترەمپ

ئاڤا نیوز

شێخ تەحنوون بن زاید، ڕاوێژکاری ئاسایشی نیشتمانیی ئیمارات، پشکێکی 500 ملیۆن دۆلاریی لە کۆمپانیایەکی خێزانی ترەمپ کڕی و لە بەرامبەردا ڕێگەی پێدرا پێشکەوتووترین چیپی ژیریی دەستکرد بکڕێت.

بڵاوکراوەی فەرمی: بەپێی ڕاپۆرتێکی ڕۆژنامەی "وۆڵ ستریت جۆرناڵ"، شێخ تەحنوون، 49%ـی پشکەکانی کۆمپانیای (World Liberty Financial)ی کڕیوە. ئەم کۆمپانیایە لەلایەن کوڕەکانی ترەمپ و ستیڤ ویتکۆف، نێردەی ترەمپ بۆ ڕۆژهەڵاتی ناوەڕاست بەڕێوە دەچێت.

زانیاریی زیاتر: لە کاتێکدا ئیدارەی پێشووی ئەمریکا بەهۆی ترسی نزیکبوونەوەی ئیمارات لە چین، هەناردەکردنی "چیپە زیرەکەکانی" (AI Chips) قەدەغە کردبوو، بەڵام دوای ئەم وەبەرهێنانە دەرگاکان کرانەوە و ئیدارەی ترەمپ ڕەزامەندیی دا ساڵانە 500,000 لەو چیپە پێشکەوتووانە بداتە ئەبوزەبی.

ئەوەی پێویستە بیزانیت: ئەمە یەکەمجارە لە مێژوودا بەرپرسێکی بیانیی ببێتە خاوەن پشکێکی ئاوا گەورە لە کۆمپانیایەکی سەرۆکی ئەمریکا لە کاتی دەسەڵاتەکەیدا، کە تێیدا 187 ملیۆن دۆلار ڕاستەوخۆ چووەتە ناو هەژماری کۆمپانیاکانی خێزانی ترەمپ.

باکگراوند: ئیمارات هەوڵێکی زۆر دەدات تاوەکو ببێتە ناوەندی تەکنەلۆژیای ناوچەکە، بەڵام پێشتر ڕووبەڕووی سزای واشنتن ببووەوە بەهۆی ترسی دزەکردنی تەکنەلۆژیای ئەمریکیی بۆ چین. ئیدارەی ترەمپ بە پێچەوانەی ئیدارەی پێشوو، بازرگانیی ڕاستەوخۆ و هاوبەشیی ئابووریی وەک تاکە ڕێگە بۆ بەهێزکردنی هاوپەیمانێتییە ستراتیژییەکان دەبینێت.