شاندێکی چوارچێوەی هەماهەنگی لە هەولێرەوە چووە سلێمانی

ئاڤا نیوز

شاندی باڵای چوارچێوەی هەماهەنگی بەسەرۆکایەتیی محەممەد شیاع سوودانی، گەیشتە فڕۆکەخانەی نێودەوڵەتی سلێمانی و لەلایەن بافڵ تاڵەبانی سەرۆکی یەکێتی نیشتمانی کوردستان پێشوازیی لێکرا.

وێنە گەورەکە: بەمەبەستی یەکلاییکردنەوەی پۆستی سەرۆککۆمار و پێکهێنانی حکومەتی نوێی عێراق، ئەمڕۆ دووشەممە، شاندی باڵای چوارچێوەی هەماهەنگی بەسەرۆکایەتی محەممەد شیاع سوودانی، گەیشتە هەولێر و لەگەڵ سەرۆک بارزانی و کۆبووەوە.

چیرۆکی سەرەکی: لە کۆبوونەوەکەی پیرمام دا تاوتوێی شایستە دەستوورییەکانی هەرێمی کوردستان کرا، دواتر تاوتوێی پرسی سەرۆککۆمار و بەردەوامبوون لە تەواوکردنی هەنگاوەکانی پێکهێنانی حکومەت بەپێی ئەنجامی هەڵبژاردنەکانی ئەنجوومەنی نوێنەران کرا.

٠ هاوکات باس لە دوایین پێشهاتەکانی ئێستای ناوچەکە و دۆخی سووریا و ناوچەکەش کرایەوە، جەخت لە گرنگی یەکخستنی گوتاری سیاسی نیشتیمانیی عێراقی کرایەوە سەبارەت بەو گۆڕانکاری و ڕووداوانە.

زانیاریی ئاڤا: دوای کۆتاییهاتنی کۆبوونەوەکانیان لە هەولێر شاندەکەی چوارچێوەى هەماهەنگى گەیشتە سلێمانی و دوای پێشوازیکردنیان لە فڕۆکەخانەی نێودەوڵەتی سلێمانی، لە دەباشان لەگەڵ لەگەڵ بافڵ تاڵەبانی، سەرۆکی یەکێتی نیشتمانی کوردستان کۆدەبنەوە.

ئەوەی پێویستە بیزانیت: شاندە باڵاکەی چوارچێوەی هەماهەنگی پێکهاتوون لە محەممەد شیاع سوودانی، سەرۆکی هاوپەیمانی ئاوەدانکردنەوە و گەشەپێدان، هادی عامری، ئەمینداری ڕێکخراوی بەدر و موحسین مەندەلاوی، سەرۆکی هاوپەیمانی ئەساس، عەباس عامری ئەمینداری گشتیی چوارچێوەی هەماهەنگیش یاوەری شاندەکەیە.

لێدوانی فەرمی: لەبارەی ئامانجی سەردانەکەش عەباس عامری، ئەمینداری گشتیی چوارچێوەی هەماهەنگی ئاشکرای کرد کە، ئامانجی سەردانەکە بۆ دروستکردنی لێکتێگەیشتنە لەنێوان پارتی و یەکێتی بۆ یەکلاییکردنەوەی دۆسیەی سەرۆکایەتیی کۆماری عێراق.