دەم پارتی: بەهۆی هاوسۆزی دەربڕین بۆ ڕۆژئاوا 550 کەس لە تورکیا دەستگیرکراون

ئاڤا نیوز

جێگری سەرۆکی فراکسیۆنی دەم پارتی نیگەرانیی خۆی لە دەستگیرکردنی 550 کەس بەهۆی هاوسۆزیی بۆ ڕۆژئاوای کوردستان دەربڕی و داوای کردنەوەی دەروازە سنوورییەکان دەکات بۆ گەیاندنی هاوکاریی بۆ کۆبانی.

لێدوانی فەرمی: گوڵستان کڵچ کۆچیغیت، جێگری سەرۆکی فراکسیۆنی دەم پارتی لە پەرلەمانی تورکیا ڕایگەیاند: هیچ پاساوێک بۆ دەستگیرکردنی 550 کەس نییە؛ لە کوێی جیهاندا داکۆکیکردن لە گەلەکەت و شکاندنی گەمارۆی سەر کۆبانێ بووەتە تاوان؟ ئەم ڕێککەوتنەی نێوان هەسەدە و دیمەشقیش سەرەتایەکە بۆ بنیادنانی سووریایەکی دیموکرات کە تێیدا مافی هەمووان پارێزراو بێت.

زانیاریی زیاتر: ئەندامەکەی دەم پارتی ئاشکرای کرد کە لە کۆی ئەو کەسانەی لە کاتی خۆپیشاندانەکاندا دەستگیر کراون، بڕیاری زیندانیکردن بۆ 80 کەسیان دەرچووە، کە ئەمەش وەک فشارێکی سیاسیی لێک دەدرێتەوە.

لەلایەکی دیکەوە: کۆچیغیت داوای لە حکومەتی تورکیا کرد دەستبەجێ دەروازەی سنووریی "موریشتپنار" بکاتەوە تاوەکو ئەو هاوکارییانەی شارەوانییەکانی دەم پارتی بۆ خەڵکی لێقەوماوی ڕۆژئاوا کۆیانکردووەتەوە، بگەنە دەست منداڵانی کۆبانێ.

٠ سەبارەت بە پڕۆسەی ئاشتیی لە ناوخۆی تورکیا، ئاماژەی بەوە کرد کە هێشتا داوای دیداری فەرمییان لە ئەردۆغان نەکردووە، بەڵام داوایان لە سەرۆکی پەرلەمان کردووە لیژنەی نووسینەوەی ڕاپۆرتی کۆتایی کۆبکاتەوە تاوەکو یاساکانی پەیوەست بە ئاشتیی دەربچن و پڕۆسەکە هەنگاوی کردەییی بەرەو پێشەوە بنێت.