ناوەڕۆکی کۆبوونەوەی شاندی چوارچێوەی هەماهەنگی و یەکێتی لەبارەی پرسی سەرۆککۆمار بڵاودەکرێتەوە

 

چیرۆکی سەرەکی: ئەمڕۆ دووشەممە، دوای کۆتاییهاتنی کۆبوونەوەکانیان لە هەولێر، شاندی چوارچێوەى هەماهەنگى گەیشتە شاری سلێمانی و لە فڕۆکەخانەی نێودەوڵەتی سلێمانی لەلایەن ڕەفعەت عەبدوڵڵا، جێگری سەرۆکی یەکێتیی نیشتمانیی کوردستان و شاڵاو کۆسرەت رەسوڵ، ئەندامی مەکتەبی سیاسی و هەڤاڵ ئەبوبەکر، پارێزگاری سلێمانییەوە پێشوازیکران.

ڕاگەیێنراوی فەرمی: بەگوێرەی ڕاگەیێنراوێکی نووسینگەی سەرۆکوەزیران، محەممەد شیاع سوودانی، لە کۆبوونەوەیان لەگەڵ بافڵ تاڵەبانی، پێشهاتە سیاسییەکانی عێراق و ناوچەکە تاوتوێ کراو هەردوولا جەختیان لەسەر گرنگیی یەکلاکردنەوەی پۆستی سەرۆککۆمار و تەواوکردنی ڕێکارە دەستوورییەکان بۆ داهاتووی عێراق کردەوە.

 

هەر بەگوێرەی ڕاگەیێنراوەکە، لە کۆبوونەوەکە جەخت لەسەر پێکهێنانی حکومەتێک کرایەوە کە خواستەکانی هاووڵاتییان دابین بکات و بەردەوامی بە پڕۆسەی چاکسازی و ئاوەدانکردنەوە و گەشەپێدانی عێراق لە چەند ساڵی داهاتوودا بدات. هەردوولا هاوڕابوون لەسەر پێویستیی یەکخستنی هەڵوێستە نیشتمانییەکان بەرامبەر ئەو ئاڵنگارییە مەترسیدارانەی کە ئێستا بەهۆی بارودۆخی هەستیاری ناوچەکەوە هاتوونەتە ئاراوە و پێویستییان بە یەکدەنگیی لایەنەکان هەیە.

 

زانیاریی زیاتر: شاندە باڵاکەی چوارچێوەی هەماهەنگی پێکهاتوون لە محەممەد شیاع سوودانی، سەرۆکی هاوپەیمانی ئاوەدانکردنەوە و گەشەپێدان، هادی عامری، ئەمینداری ڕێکخراوی بەدر و موحسین مەندەلاوی، سەرۆکی هاوپەیمانی ئەساس، عەباس عامری ئەمینداری گشتیی چوارچێوەی هەماهەنگیش یاوەری شاندەکەیە.