ترەمپ پێنج مەرج بۆ ئێران دادەنێت

ئاڤا نیوز

ئیسرائیل مەرجەکانی ترەمپی بۆ ڕێککەوتن لەگەڵ ئێران ئاشکرا کرد، کە هەڵوەشاندنەوەی تەواوەتیی بەرنامە ئەتۆمیی و مووشەکییەکەی تاران و بڕینی دەستی گرووپە چەکدارەکان لە ناوچەکە دەگرێتەوە.

لێدوانی فەرمی: بەرپرسێکی باڵای ئیسرائیلیی بە سایتی "ئەلمۆنیتەر"ی ڕاگەیاندووە: ترەمپ بە جدیی دەیەوێت هێرش بکاتە سەر ئێران؛ ئەگەر بەتەمای هێرش نەبێت، کێ ئەو هەموو خەرجییە دەکات بۆ جووڵاندنی کەشتیگەلە زەبەلاحەکان تەنها بۆ چاوترساندنی تاران؟

زانیاریی زیاتر: فەرماندە سەربازییەکانی ئەمریکا و ئیسرائیل بۆ تاوتوێکردنی لێکەوتەکانی هێرش بۆ سەر ئێران کۆبوونەوە و تێیدا پێنج مەرجە سەرەکییەکەی ترەمپیان بۆ تاران ئاشکرا کرد مەرجەکان بریتین لە:

٠ ڕادەستکردنی نزیکەی 400 کیلۆگرام یۆرانیۆمی پیتێنراو، هەڵوەشاندنەوەی تەواوی بەرنامەی ئەتۆمیی، لەناوبردنی مووشەکە بالیستییەکان، ڕاگرتنی پەرەپێدانی بەرنامەی مووشەکیی، و کۆتاییهێنان بە پشتیوانیکردنی گرووپە چەکدارەکان لە یەمەن، عێراق و لوبنان.

لەلایەکی دیکەوە: ئیسرائیل پێیوایە تاران تەنها بۆ کات کوشتن باسی دانوستان دەکات و هیچ نییەتێکی جدیی نییە، هەر بۆیە فشار دەخاتە سەر واشنتن تاوەکو پێکەوە هێرشێکی هاوبەش بکەنە سەر ژێرخانی مووشەکیی ئێران پێش ئەوەی تاران بتوانێت هاوسەنگیی هێز لە بەرژەوەندیی خۆی و هاوپەیمانەکانی بگۆڕێت.