سەرۆک بارزانی بە سێ ڕێگا میکانیزمی پۆستی سەرۆککۆمار دیاریی دەکات

ئاڤا نیوز

شاندێكی باڵای شیعەکان سەردانی هەولێری کرد و لەگەڵ سەرۆک مەسعود بارزانی کۆبوونەوە و هەنگاوەکانی پێکهێنانی حکومەتی داهاتوو و یەکلاکردنەوەی پۆستی سەرۆککۆماریان تاوتوێ کرد و سەرۆک بارزانی جەختی لەسەر ئەوە کردەوە سەرۆککۆمار پشکی کوردە و بە سێ ڕێگا  میکانیزمی پۆستی سەرۆککۆماری دیاریی کرد.

چیرۆکی سەرەکی: ئەمڕۆ 2-2-2026، شاندێكی باڵای شیعەکان كە پێكهاتبوو لە محەممەد شیاع سودانی، سەرۆكی هاوپەیمانیی ئاوەدانكردنەوە و گەشەپێدان و هادی عامری، سكرتێری گشتیی ڕێكخراوی بەدر و موحسین مەندەلاوی، سەرۆكی هاوپەیمانیی ئەساس و عەباس ڕازی، سكرتێری گشتیی چوارچێوەی هەماهەنگی، بۆ پرسی پێکهێنانی حکومەتی داهاتوو و یەکلاکردنەوەی پۆستی سەرۆککۆماری عێراق، لەگەڵ سەرۆک بارزانی کۆبوونەوە و هەریەک لە نێچیرڤان بارزانی سەرۆکی هەرێمی کوردستان و مەسرور بارزانی سەرۆکوەزیران لە کۆبوونەوەکەدا بەشدار بوون.

ڕاگەیێنراوی فەرمی: لەبارەی کۆبوونەوەی نێوان شاندەکە لەگەڵ سەرۆک بارزانی، بارەگای بارزانی ڕاگەیێنراوێکی بڵاوکردەوە و بەگوێرەی ڕاگەیێنراوەکە، باسی هەڵبژاردنی سەرۆککۆمار و پێکهێنانی حکومەتی عێراقیان کردووە. سەرۆک بارزانی بە شاندی شیعەکانی وتووە: "سەرۆككۆمار پشكی كوردە و دەبێت میكانیزمێكی دیاریكراو بۆ هەڵبژاردنی دیاری بكرێت، ئەم میکانیزمەش بچەسپێنرێت بۆ ئەوەی هەموو جارێک پڕۆسەی سیاسی تووشی كێشە نەبێت و بەپێی ئەو میكانیزمە کاندیدی سەرۆككۆمار هەڵبژێردرێت."

لە کۆبوونەوەکەی ئەمڕۆ چی وترا: بەگوێرەی زانیارییەکانی ئاڤا، سەرۆک بارزانی لە کۆبوونەوەکەدا لەگەڵ شاندی باڵای شیعەکان، باسی میکانیزمی هەڵبژاردنی پۆستی سەرۆکۆماری داهاتووی عێراقی کردووە کە دەبێت بەم شێوەیە بێت:

یەکەم: لە پەرلەمانی کوردستان کاندیدی سەرۆککۆمار یەکلایی بکرێتەوە.

دووەم: فراکسیۆنە کوردستانییەکان لە پەرلەمانی عێراق کاندیدی سەرۆککۆمار دیاری بکەن.

سێیەم: سەرۆککۆمار بدرێت بەو لایەنە کوردییەی زۆرترین کورسی هێناوە.

ئەوەی پێشبینی دەکرێت: بەگوێرەی زانیارییەکانی ئاڤا، پارتی و یەکێتی لە گفتوگۆیەکانیان بەردەوام دەبن بۆ ئەوەی بگەنە ڕێککەوتن لەسەر کاندیدێکی هاوبەش بۆ پۆستی سەرۆککۆمار و کۆبوونەوەی پەرلەمانی عێراقیش بۆ هەڵبژاردنی سەرۆککۆمار، ڕۆژی شەممەی داهاتوو دەکرێت.

ئەمەش بزانە: هەر بەگوێرەی ڕاگەیێنراوی بارەگای بارزانی، لە کۆبوونەوەکەدا، بارودۆخی سیاسیی سووریا و گۆڕانکارییەکانی ناوچەکە گفتوگۆیان لەسەر کرا و هاوکات جەخت لە هەماهەنگیی نێوان لایەنەکان بۆ تێپەڕاندنی کێشە سیاسییەکان کرایەوە.