سەرۆک بارزانی پێشوازیی لە باڵیۆزی بەریتانیا لە عێراق دەکات

ئاڤا نیوز

سەرۆک بارزانی پێشوازیی لە باڵیۆزی بەریتانیا لە عێراق کرد؛ لە دیدارێکدا پرسی پۆستی سەرۆککۆماری عێراق، پۆستی سەرۆکوەزیرانی عێراق و بارودۆخی ناوچەکە گفتوگۆیان لەبارەوە کرا.

ڕاگەیێنراوی فەرمی: بارەگای بارزانی بڵاوی کردووەتەوە؛ ئەمڕۆ دووشەممە، 02-02-2026، لە پیرمام سەرۆک مەسعود بارزانی پێشوازیی لە عیرفان سدیق، باڵیۆزی بەریتانیا لە عێراق کرد.

زانیاریی زیاتر: لە دیدارەکەدا کە ئاندرۆ بیزلی، کونسوڵی گشتیی بەریتانیا لە هەولێر ئامادەی بوو، باس لە دوا پەرەسەندنە سیاسییەکانی عێراق، هەوڵەکان بۆ پێکهێنانی حکوومەتی نوێ و پرسی دیاریکردنی سەرۆککۆماری عێراق کرا.

ئەوەی پێویستە بیزانیت: لە دیدارەکەدا سەرۆک بارزانی ئاماژەی بەوە دا کە پۆستی سەرۆککۆماری عێراق پشکی کوردە و پێویستە میکانیزمێکی گونجاو بۆ هەڵبژاردن و دیاریکردنی کاندیدی سەرۆککۆمار ئامادە بکرێت و بکرێتە بنەمایەکی جێگیر، بۆ ئەوەی پرۆسەی سیاسی لە عێراقدا دوای هەر هەڵبژاردنێک تووشی گرفت نەبێت.

٠ سەبارەت بە پۆستی سەرۆکوەزیرانیش، سەرۆک بارزانی ڕایگەیاند، ئەم پۆستە پشکی نێو ماڵی شیعەیە و ئەوان دەبێت خۆیان ئەم بابەتە یەکلا بکەنەوە.

٠ بارودۆخی سووریا و ڕێککەوتنی ئەم دواییەی نێوان حکوومەتی سووریا و هێزەکانی سووریای دیموکرات (هەسەدە)، پرۆسەی ئاشتی لە تورکیا و ئاڵۆزییەکانی ناوچەکە بەگشتی، تەوەرێکی دیکەی ئەم دیدارە بوون.