مەسرور بارزانی و جێگری سەرۆکوەزیرانی ئیمارات: لە هەموو بوارەکان پەیوەندییەکانمان بەهێزتر دەکەین

ئاڤا نیوز

لە یەکەم ڕۆژی لووتکەی جیهانیی حکوومەتەکاندا، مەسرور بارزانی، سەرۆکوەزیرانی هەرێمی کوردستان، کۆمەڵێک دیدار و کۆبوونەوەی لەگەڵ سەرۆکوەزیرانان و نوێنەرانی ژمارەیەک وڵات ئەنجام دا. نیوەڕۆی ئەمڕۆش لەگەڵ جێگری سەرۆکوەزیران و وەزیری ناوخۆی ئیمارات کۆبووەوە؛ لە کۆبوونەوەکەدا باسی گۆڕانکارییەکانی ناوچەکە کراوە.

چیرۆکی سەرەکی: ئەمڕۆ سێشەممە، 03-02-2026، مەسرور بارزانی، سەرۆکوەزیرانی هەرێمی کوردستان، لە دوبەی لەگەڵ شێخ سەیف بن زاید ئال نەهیان، جێگری سەرۆکوەزیران و وەزیری ناوخۆی ئیمارات کۆبووەوە. لە کۆبوونەوەکەدا هەردوولا هاوڕا بوون لەسەر بەهێزترکردنی پەیوەندیی دۆستانە و تایبەتیی نێوان هەرێمی کوردستان و ئیمارات لە هەموو بوارەکاندا.

ڕاگەیێنراوی فەرمی: بەگوێرەی ڕاگەیەندراوی حکوومەتی هەرێمی کوردستان، دوایین گۆڕانکاری و پێشهاتەکانی دۆخی گشتیی عێراق و ناوچەکە، تەوەرێکی دیکەی گفتوگۆکانی کۆبوونەوەکە بوو.

باکگراوند: ئێوارەی دوێنێ دووشەممە، 02-02-2026، مەسرور بارزانی، سەرۆکوەزیرانی هەرێمی کوردستان، لەسەر بانگهێشتی فەرمیی شێخ محەممەد بن ڕاشد ئال مەکتووم، جێگری سەرۆک و سەرۆکوەزیرانی ئیمارات و حاکمی دوبەی، بە مەبەستی بەشداریکردن لە لووتکەی جیهانیی حکوومەتەکان 2026، گەیشتە دوبەی.