ئاسایش هێرشێکی سەر کاروانی هێزەکانی دیمەشق لە حەسەکە پووچەڵ دەکاتەوە

ئاڤا نیوز

ئاسایشی ڕۆژئاوا ڕایدەگەیێنێت، گرووپێکی تووندڕەو تەقەیان لەو کاروانە ئەمنییەی حکومەت کردووە کە بۆ جێبەجێکردنی ڕێککەوتنی یەکخستنی هێزەکان دەچوونە ناو شاری حەسەکە.

ڕاگەیێنراوی فەرمی: فەرماندەیی گشتیی هێزەکانی ئاسایشی ناوخۆ لە کانتۆنی جەزیرە ڕاگەیێنراوێکی فەرمیی بڵاوکردەوە و دەڵێت: "هێزەکانی ئاسایش ڕووبەڕووی گرووپێکی تووندڕەو بوونەتەوە کە تەقەیان لە کاروانێکی وەزارەتی ناوخۆی سووریا کردووە لە کاتی چوونە ناوەوەیان بۆ شاری حەسەکە."

بەگوێرەی ڕاگەیێنراوەکەی ئاسایشی ناوخۆ، "لە ئەنجامی بەرپەرچدانەوەی هێزەکاندا، ژمارەیەک لەو چەکدارانە دەستگیرکراون و یەکێک لە ئەندامانی ئاسایش بریندار بووە، هاوکات لێکۆڵینەوە لەگەڵ دەستگیرکراوەکان دەستیپێکردووە."

زانیاریی زیاتر: ئاسایشی ناوخۆ ئاماژە بەوە دەدات، "ئاسایش بۆ پاراستنی گیانی هاووڵاتییان و ڕێگریکردن لە هەر پشێوییەک، قەدەغەی هاتووچۆی کاتیی لە ناوچەکەدا ڕاگەیاندووە تاوەکو بە تەواوی ئاسایشی شارەکە جێگیر دەبێت. هێزەکان جەخت لە پابەندبوونی خۆیان بە ڕێککەوتنی دیمەشق و هەسەدە دەکەنەوە و ڕایدەگەیێنن کە ڕێگە نادەن هیچ گرووپێک ئاشتی و سەقامگیریی ئەم دواییە تێک بدات."