زانیاریی نوێ لە بارەی ناردنی داهاتی ناوخۆی هەرێمی کوردستان

ئاڤا نیوز

وەزارەتی دارایی هەرێمی کوردستان ئامادەکاریی دەکات بۆ گواستنەوەی 120 ملیار دیناری داهاتی ناوخۆ بۆ سەر هەژماری حکومەتی فیدراڵیی، ئەوەش وەک جێبەجێکردنی مەرجی سەرەکیی بۆ خەرجکردنی مووچە.

چیرۆکی سەرەکی: نووسراوی ناردنی 120 ملیار دینار داهاتی ناوخۆ گەیشتووەتە وەزارەتی دارایی و ئابووری هەرێمی کوردستان، ئێستا ئامادەکاری دەکرێت بۆ ئەوەی بخرێتە سەر هەژماری بانکی وەزارەتی دارایی عێراق لە لقی هەولێری بانکی ناوەندی.

زانیاریی زیاتر: بڕی 120 ملیار دینارەکە لە داهاتی نانەوتیی هەرێمی کوردستان کۆکراوەتەوە، کە تێیدا 72 ملیار دیناری پشکی هەولێر و دهۆک، و 48 ملیار دیناریش پشکی سلێمانی و هەڵەبجەیە.

زانیاریی تایبەت: سەرچاوەیەک لە وەزارەتی دارایی بە ئاڤای ڕاگەیاند کە تەنها چاوەڕوانی گەیشتنی داهاتی سلێمانین تاوەکو کۆی پارەکە بە نەختینە ڕادەستی لقی هەولێری بانکی ناوەندیی بکرێت و بخرێتە سەر هەژماری وەزارەتی دارایی عێراق. لە لایەکی دیکەوە، پڕۆسەی وردبینیی لە لیستی مووچەی مانگی یەک لە بەغدا بە سەرکەوتوویی کۆتایی هاتووە و تیمی تەکنیکیی هەرێم گەڕاونەتەوە هەولێر، کە ئەمەش ئاماژەیە بۆ ئەوەی هیچ ئاستەنگێکی دیکە بۆ ناردنی مووچە لە ئارادا نەماوە.

باکگراوند: ساڵی ڕابردوو حکومەتی هەرێمی کوردستان و حکومەتی فیدراڵیی ڕێککەوتن کە پشکی بەغدا لە داهاتی نانەوتیی هەرێم بۆ 120 ملیار دینار زیاد بکرێت. ئەم پارەیە مانگانە وەک بەشێک لە ڕێکارە داراییەکان ڕادەست دەکرێت تاوەکو دڵنیایی بدرێت لەوەی کە هەردوولا پابەندی یاسای بودجە و لێکتێگەیشتنە سیاسییەکانن بۆ دابینکردنی شایستە داراییەکانی مووچەخۆران.