لەگەڵ پێکهێنانی حکومەت، ڕێککەوتنی ئاویی عێراق و تورکیا کارا دەکرێت

ئاڤا نیوز

ڕاوێژکاری سەرۆکوەزیرانی عێراق بۆ کاروباری ئاو دەڵێت، لەگەڵ پێکهێنانی حکومەتی نوێی عێراق، ڕێککەوتنی ئاویی نێوان وڵاتەکەیان و تورکیا کارا دەکرێت، ئاشکراشی دەکات تائێستا لێکتێگەیشتن بۆ پارەدارکردنی پڕۆژەکانی ناو ڕێککەوتنەکە نەخراوەتە بواری جێبەجێکردنەوە.

لێدوانی فەرمی: تورهان موفتی، ڕاوێژکاری سەرۆکوەزیرانی عێراق بۆ کاروباری ئاو بە ڕۆژنامەی سەباحی ڕاگەیاندووە، کارانەکردنی لێکتێگەیشتنی تایبەت بە پارەدارکردنی پڕۆژەکانی ئاو لە چوارچێوەی ڕێککەوتنی ئاوی بەغدا و ئەنقەرە، لەگەڵ گۆڕانی حکومەتی ئێستای عێراق بۆ حکومەتێکی کاربەڕێکەر، دوو هۆکارن کە وایان کردووە ڕێککەوتنەکە نەچێتەبواری جێبەجێکردنەوە.

- دەشڵێت، لەگەڵ پێکهێنانی حکومەتی نوێی عێراق، چاوەڕێ دەکرێت ڕێککەوتنە ڕاستەوخۆ کارا بکرێت، ئەویش بەهۆی ئەوەی مەترسیی کەمبوونەوەی ئاو بەردەوامە و وەبەرهێنان لەم بوارەدا ناکرێت لەوە زیاتر دوابخرێت.

ئەوەی پێویستە بیزانیت: ئەوەش لەکاتێکدایە کۆتایی ساڵی ڕابردوو حکومەتی عێراق ڕایگەیاند، سەرجەم ئامادەکارییەکانی بەغدا و ئەنقەرە بۆ جێبەجێکردنی ڕێککەوتنی ئاوی نێوانیان لە قۆناغی کۆتاییدایە و لەماوەیەکی نزیکی داهاتوودا ڕێککەوتنەکە دەچێتە بواری جێبەجێکردنەوە.