ڕێککەوتنی ئاوی نێوان تورکیا و عێراق جێبەجێ دەکرێت

ئاڤا نیوز

ڕاوێژکاری سەرۆکوەزیرانی عێراق بۆ کاروباری ئاو ڕایگەیاند، سەرجەم ئامادەکارییەکانی بەغدا و ئەنقەرە بۆ جێبەجێکردنی ڕێککەوتنی ئاوی نێوانیان لە قۆناغی کۆتایی دایە و لەماوەیەکی نزیکی داهاتوودا ڕێککەوتنەکە دەچێتەبواری جێبەجێکردنەوە.

 

وێنە گەورەکە: ڕۆژی 2ـی مانگی 11ـی ئەمساڵ، عێراق و تورکیا میکانیزمێکی نوێیان بۆ ڕێککەوتنی هاوکاریی ئاو واژۆ کرد. ئەم ڕێککەوتنە چەندین خاڵی سەرەکی لەخۆ دەگرێت، لەوانە دابینکردنی ئاو لە بەرامبەر بەڕێوەبردنی تەواوی دۆسیەی ئاوی عێراق لەلایەن تورکیاوە، هەروەها پارەدارکردنی پڕۆژەکان لە ڕێگەی فرۆشی نەوتی عێراقەوە.

 

لێدوانی فەرمی: تۆرهان موفتی، ڕاوێژکاری سەرۆکوەزیرانی عێراق بۆ کاروباری ئاو بە ڕۆژنامەی سەباحی ڕاگەیاندووە، لێکتێگەیشتنەکە سێ قۆناغە، قۆناغی یەکەم ساڵی ڕابردوو لەنێوان سەرۆکوەزیرانی عێراق  و سەرۆککۆماری تورکیا واژۆ کرا، قۆناغی دووەمیش مانگی تشرینی دووەمی ئەمساڵ بوو کە تایبەت بوو بە چۆنییەتی پارەدارکردنی پڕۆژەکە، ئێستاش لە قۆناغی سێیەمدان کە تایبەت بە ئامادەکارییە لۆجستی و کارگێڕییەکان.

 

ئەوەشی خستووەتەڕوو، ئامادەکارییەکان بەرەو کۆتایی دەچن و دوای ئەوەی بەغدا و ئەنقەرە کۆتاییهاتنی ئامادەکارییەکانیان بە یەکتری ڕاگەیاند، لە ماوەیەکی نزیکی داهاتوودا ڕێککەوتنەکە دەچێتەبواری جێبەجێکردنەوە.