جێگری سەرۆکی ئەمریکا: لە ئەگەری شکستی دانوستانەکان ترەمپ بژاردەی سەربازی دژی ئێران بەکاردەهێنێت

ئاڤا نیوز

جەی دی ڤانس، جێگری سەرۆکی ئەمریکا هۆشداریی بە دەسەڵاتدارانی ئێران دەدات و دەڵێت، لە ئەگەری شکستی دانوستانەکان، دۆناڵ ترەمپ هێزی سەربازی دژتان بەکاردەهێنێت.

وێنە گەورەکە: بڕیارە سبەی هەینی نوێنەرانی ئێران و ئەمریکا لە مەسقەتی پایتەختی عومان کۆببنەوە و هەوڵی گەیشتن بە ڕێککەوتنێک بدەن، ئەمریکایش کۆمەڵێک مەرجی بۆ ئێران داناوە و ئێرانیش تاوەکو ئێستا ڕازی بوونی خۆی بە مەرجەکان ڕانەگەیاندووە.  

لێدوانی فەرمی: ڤانس لە چاوپێکەوتنێکدا ڕایگەیاند، ئەمریکا بە هیچ شێوەیەک ڕێگە نادات ئێران ببێتە خاوەنی چەکی ئەتۆمی و هەموو شتێک دەکات بۆ ئەوەی ڕێگری لەو کارە بکات. 

- دەڵێت، واشنتن بە جددی هەوڵ دەدات لە ڕێگەی دانوستان و دیپلۆماسییەوە کێشەکان چارەسەر بکات، بەڵام ئەگەر ئێران هیچ بژاردەیەکی دیکەی بۆ نەهێڵێتەوە، ئەوکاتە ترەمپ بژاردەی سەربازی دژ بە ئێران بەکاردەهێنێت.

- ڤانس ئاماژەی بەوەدا، ترەمپ نایەوێت ئەوەی پێشتر لە عێراق ڕووی دا جارێکی دیکە ڕووبداتەوە، تاوەکو دوایین ساتەکان هەوڵی گەیشتن بە ڕێککەوتنێکی دروست لەگەڵ ئێران دەدات.