لە ئەنبار دەست بەسەر کۆگایەکی چەک و تەقەمەنی داعشدا گیرا

ئاڤا نیوز

وەزارەتی ناوخۆی عێراق دەستبەسەرداگرتنی کۆگایەکی چەک و تەقەمەنی ڕێکخراوی داعشی لە بیابانەکانی پارێزگای ئەنبار لە ڕۆژئاوای عێراق ڕاگەیاند، کە زیاتر لە 100 جۆر چەک و تەقەمەنی لە خۆدەگرێت.

ڕاگەیێنراوی فەرمی: وەزارەتەکە ئەمڕۆ پێنجشەممە لە ڕاگەیێنراوێکدا باسی لەوەشکردووە، لە بیابانەکانی قەزای ڕوتبەی ئەنبار، بەهاوبەشی سەرجەم هێزە ئەمنییەکان، هەڵمەتێکی فراوانیان بۆ لەناوبردنی مۆڵگەکانی داعش ئەنجامداوە و تیایدا دەیان جۆر چەک و تەقەمەنی دەستیان بەسەردا گیرا.

زانیاریی زیاتر: ئەوەشی خستووەتەڕوو، هەڵمەتەکان بەردەوام دەبن و ڕێگە نادەن داعش ڕیزەکانی ڕێکبخاتەوە و ئاسایشی وڵات بە ئامانج بگرێتەوە.

ئەوەی پێویستە بیزانیت: وەک لە وێنەکاندا دەردەکەوێت لەناو ئەو چەکانەی دەستیان بەسەردا گیراوە دۆشکە، هاوەن، بی کەی سی، بۆمبی چێنراو، پشتێنی بۆمبڕێژکراو، مۆبایلی بۆمبڕێژکراو و چەندین جۆری دیکەی تەقەمەنی لەو مۆڵگەیەدا دەستیان بەسەردا گیراوە.