ئیمارات جەخت لە بەردەوامبوونی پشتیوانیی و هاوکاریکردنی حکومەتی هەرێمی کوردستان دەکات

ئاڤا نیوز

سەرۆکوەزیران مەسرور بارزانی لە دیدارێکیدا پیرۆزبایی لە سەرۆکی لوتکەی جیهانیی حکومەتەکان و وەزیری کاروباری ئەنجومەنی وەزیرانی ئیمارات دەکات، بە بۆنەی سەرکەوتنی لوتکەکە؛ لای خۆیەوە وەزیری کاروباری ئەنجومەنی وەزیرانی ئیمارات جەختی لە بەردەوامی پشتیوانی هەرێمی کوردستان لە بوارە جۆراوجۆرەکان کردەوە.

چیرۆکی سەرەکی: بە بەشداری سەرۆکوەزیران مەسرور بارزانی، سێیەم رۆژی لووتکەی حکومەتەکانی جیهان لە دوبەی بەڕێوەدەچێت، ئەمڕۆ دوا ڕۆژی لووتکەکەیە، تێیدا پانێل و چالاکیەکان و گفتوگۆی سەرکردە و بەشداربووان بەردەوامن و سەرۆکوەزیران مەسرور بارزانی، ژمارەیک دیدار و کۆبوونەوەی لەگەڵ سەرۆک و سەرکردە بەشداربووەکانی دەبێت.

پەیامی فەرمی: سەرۆکوەزیران مەسرور بارزانی، لە هەژماری تایبەتی خۆی لە ئێکس پەیامێکی بڵاوکردووە و نووسیوویەتی: "پیرۆزبایی لە محەممەد قرقاوی سەرۆکی لوتکەی جیهانیی حکومەتەکان و وەزیری کاروباری ئەنجومەنی وەزیرانی ئیمارات کرد بە بۆنەی سەرکەوتنی لوتکەکەکە کە ئەمڕۆ بووەتە یەکێک لە گرنگترین کۆنفڕانس و لوتکەکانی ناوچەکە و جیهان." 

لە بەشێکی دیکەیدا ئاماژەی بەوەداوە، "سوپاسیی هاریکاریی و پشتیوانیی بەردەوامی دەوڵەتی ئیماراتی کردووە کە نموونەیەکی پێشکەوتوو و گەشەسەندووی ئابووری و حوکمڕانییە."

لەلایەکی دیکەوە: وەزیری کاروباری ئەنجومەنی وەزیرانی ئیمارات، سوپاسیی بەشداریی و ئامادەبوونی هەرێمی کوردستانی کردووە لە لوتکەکە و جەختی لە بەردەوامبوونی پشتیوانیی و هاوکاریکردنی حکومەتی هەرێمی کوردستان لە بوارە جۆراوجۆرەکان کردەوە و ئاماژە بە پلاتفۆرمی یاسایی درا کە بڕیارە لەم نزیکانەدا، بکەوێتە بواری جێبەجێکردن کە بەشێکە لە بڕگەکانی ئەو یادداشتی لەیەکتێگەیشتنەی کە لە نێوان هەردوولادا واژۆ کراوە.