وەزارەتی خوێندنی باڵا لەبارەی نوێکردنەوەی گرێبەستی مامۆستایان و مووچەی مانگی یەک دڵنیایی دەدات

ئاڤا نیوز

وەزارەتی خوێندنی باڵا و توێژینەوەی زانستی دەڵێت، فایلی مامۆستایانی گرێبەست تەواو بوون و ڕەوانەی وەزارەتی دارایی و ئابووری هەرێمی کوردستان کراوە و مووچەی مانگی یەک وەردەگرن.

وێنە گەورەکە: چوار هەزار و 100 مامۆستای وانەبێژی زانکۆ و پەیمانگا حکومییەکانی هەرێمی کوردستان لەسەر داهاتی ناوخۆ بە گرێبەست دامەزراون و ساڵانە گرێبەستەکانیان نوێ دەکرێتەوە، بەگوێرەی ڕێنمایی ژمارە 10ی ساڵی 2019ـی وەزارەتی دارایی و ئابووری هەرێمی کوردستان، لە کاتی داواکردن بۆ نوێکردنەوەی گرێبەست دەبێت دوو مانگ پێش تەواوبوونی ماوەی گرێبەستەکە داواکاری نوێکردنەوە ڕەوانەی وەزارەتی دارایی بکرێت.

لێدوانی فەرمی: د. توانا نەجەف، بەڕێوەبەری گشتیی فەرمانگەی کارگێریی و دارایی لە وەزارەتی خوێندنی باڵا؛ بە ئاڤای گوت، "ڕۆژی پێنجشەممە دوایین لیستی مامۆستایانمان ڕەوانەی وەزارەتی دارایی و ئابووری هەرێمی کوردستان کردووە، سەرجەم مامۆستایان گرێبەستەکانیان نوێکراوەتەوە و مووچەی مانگی یەک وەردەگرن."

ئەوەی پێویستە بیزانیت: بەشێکی زۆری مامۆستایانی گرێبەستی خوێندنی باڵا چەند ڕۆژێک لەمەوبەر فایلی نوێکردنەوەی گرێبەستەکانیان بۆ وەزارەتی دارایی نێردراوە، ترسی ئەوەیان هەبوو هاوشێوەی ساڵی ڕابردوو بەهۆی دواکەوتنی ناردنی مامەڵەکانیان مووچەکانیان دوابکەوێت.