هێمن میرانی: ڕووداوەکانی هاتووچۆ لە هەرێمی کوردستان 50% کەمیان کردووە

ئاڤا نیوز

وەزارەتی ناوخۆی حکومەتی هەرێمی کوردستان ڕایدەگەیێنێت، ڕووداوەکانی هاتووچۆ بەراورد بەساڵانی ڕابردوو بە ڕێژەی 50٪ کەمیکردووە، ئەمەش بە گرتنەبەری ڕێکارەکانی هاتووچۆ و توندووتۆڵکردنی ڕێنماییەکانی لێخوڕین.

لێدوانی فەرمی: هێمن میرانی، بەڕێوەبەری گشتیی دیوانی وەزارەتی ناوخۆی حکومەتی هەرێمی کوردستان، بەشداری لە پرۆگرامی 'نان و چا'ـی ئاڤا میدیا کرد و ڕاگەیاند: تەنیا لە کابینەی نۆیەمی حکومەتی هەرێمی کوردستاندا گۆڕانکارییەکی بەرچاو لە کەمکردنەوەی قوربانیانی ڕێگاوبانەکاندا هاتووەتە ئاراوە، بەجۆرێک ڕێژەی ڕووداوەکانی هاتووچۆ بە ڕێژەی 50% بەراورد بە ساڵانی پێش 2018 دابەزیوە، هاوکات ڕێژەی مردن و برینداربوونیش زیاتر لە 60%  کەمی کردووە.

میرانی وتیشی: ئەم پێشکەوتنە بەرچاوە بۆ چەند هۆکارێکی سەرەکی دەگەڕێتەوە، لەوانە:

٠ دانانی کامێراکانی چاودێریی خێرایی.

٠ پێداچوونەوەی ورد بە یاسا و ڕێنماییەکانی لێخوڕین.

٠ بەرزبوونەوەی ئاستی هۆشیاریی شۆفێران لە پابەندبوون بە بنەماکانی سەلامەتی لەکاتی لێخوڕیندا.

 

ئەمەش بزانە: ساڵی 2021 نەتەوە یەکگرتووەکان دەستپێشخەری کەمکردنەوەی ڕووداوەکانی هاتووچۆی ڕاگەیاند، وڵاتانی ئەندامی پابەند کرد کە دەبێت ڕێنماییەکانی هاتووچۆ توندوتۆڵ بکەن و تاوەکو ساڵی 2030 ڕێژەی 50%ـی ڕووداوەکانی هاتووچۆ کەم بکرێتەوە.