عێراقچی: ئامادەین ڕێژەی پیتاندنی یۆرانیۆم کەم بکەینەوە

ئاڤا نیوز

عەباس عێراقچی، وەزیری دەرەوەی ئێران ڕایگەیاند، ئەگەری هەیە شوێنی خولی دووەمی دانوستانەکان لەگەڵ ئەمریکا بگۆڕدرێت.

لێدوانی فەرمی: وەزیری دەرەوەی ئێران جەختی لەسەر هەڵوێستی بنەڕەتی و سەروەریی وڵاتەکەی کردەوە و ڕاگەیاند، ئێمە دژی هەر جۆرە بردنە دەرەوەیەکی یۆرانیۆمین لە وڵات، بەڵام لە هەمان کاتدا ئامادەین بۆ کەم کردنەوەی ڕێژەی پیتاندنی ماددە ئەتۆمییەکان.

- سەبارەت بە ئەگەری هەڵگیرسانی جەنگیش، عێراقچی وتی: "ئێمە خوازیاری جەنگێکی ناوچەیی نین و وڵاتانی ناوچەکەش ئەوەیان ناوێت، بەڵام هەر هێرشێکی ئەمریکا دەبێتە هۆی تێکدانی ئەم دۆخە و کاریگەری نەرێنی لەسەر دروست دەکات".

لەلایەکی دیکە: بەگوێرەی کەناڵی 12ــی ئیسرائیلی، بنیامین نەتانیاهۆ، سەرۆکوەزیرانی ئیسرائیل شەش داواکاریی خۆی گەیاندووەتە بەرپرسانی ئەمریکا کە پەیوەستن بە ئێران:

- هەڵوەشاندنەوەی تەواوەتی بەرنامە ئەتۆمییەکەی ئێران.
- توانای پیتاندنی یۆرانیۆمی ئێران بگەیەنرێتە سفر.
- بردنە دەرەوەی هەموو یۆرانیۆمی پیتێنراو لە ناوخۆی ئێران.
- هەڵوەشاندنەوەی تەواوەتی ''گرووپە چەکدارەکان'''ی سەر بە ئێران لە ناوچەکەدا.
- سنووردارکردنی مەودای مووشەکی بالیستیک بۆ 300 کیلۆمەتر.
- چاودێرییەکی درێژخایەن بۆ هەر ڕێککەوتنێکی داهاتوو.

باکگراوند: ڕۆژی هەینیی ڕابردوو، ئێران و ئەمریکا لە مەسقەتی پایتەختی عومان کۆبوونەوە و لەسەر ئەوە ڕێککەوتن کە درێژە بە کۆبوونەوەکانیان بدەن.