نەتەنیاهۆ سەبارەت بە ئێران شەش داواکاری لە ئەمریکا هەیە

ئاڤا نیوز

بنیامین نەتانیاهۆ، سەرۆکوەزیرانی ئیسرائیل شەش داواکاری سەبارەت بە ئێران داواتە ئەمریکا، یەکێک لەوانە هەڵوەشاندنەوەی تەواوەتی بەرنامەی ئەتۆمیی تارانە.

زانیاریی بەدەستهاتوو: کەناڵی 12ــی ئیسرائیلی، داواکارییەکانی بنیامین نەتانیاهۆ، سەرۆکوەزیرانی ئیسرائیلیان ئاشکرا کردووە کە شەش داواکاریی خۆی گەیاندووەتە لایەنی ئەمریکی کە ئەمانەن: 

- هەڵوەشاندنەوەی تەواوەتی بەرنامە ئەتۆمییەکەی ئێران.
- توانای پیتاندنی یۆرانیۆمی ئێران بگەیەنرێتە سفر.
- بردنە دەرەوەی هەموو یۆرانیۆمی پیتێنراو لە ناوخۆی ئێران.
- هەڵوەشاندنەوەی تەواوەتی ''گرووپە چەکدارەکان'''ی سەر بە ئێران لە ناوچەکەدا.
- سنووردارکردنی مەودای مووشەکی بالیستیک بۆ 300 کیلۆمەتر.
- چاودێرییەکی درێژخایەن بۆ هەر ڕێککەوتنێکی داهاتوو.

بۆچوونی لایەنی بەرامبەر: لەبەرامبەردا عەباس عێراقچی، وەزیری دەرەوەی ئێران  هەڵوێستەکانی ئیسرائیل بە ''شێوازی خۆزاڵکردن'' ناو برد، جەختی لەوە کردەوە کە تواناکانی بەرگریی وڵاتەکەی جێگای دانوستان نییە.

ئەوەی پێشبینی دەکرێت: لە چوارچێوەی ئەمەشدا، بڕیارە ڕۆژی چوارشەممە نەتانیاهۆ لەگەڵ دۆناڵد ترەمپ، سەرۆکی ئەمریکا لە واشنتن کۆببێتەوە و پرسی سەرەکی کۆبوونەوەکەش ئێران دەبێت.

باکگراوند: ڕۆژی هەینی هەردوو شاندی ئێران و ئەمریکا بە نێوەندگیریی عومان لە مەسقەت کۆبوونەوە. دوای کۆبوونەوەکە کەشەکە بە ئەرێنی وەسف کرا و بڕیارە گەڕی دووەمی گفتوگۆکان بەڕێوەبچێت، بەڵام تا ئێستا شوێن و کاتی کۆبوونەوەکە دیار نییە.