ئاڤای خەڵک؛ لە سلێمانی دایبابان لەبارەی دانانی نمرە گلەیی لە بەشێکی مامۆستایان دەکەن

ئاڤا نیوز

ژمارەیەک لە دایبابان لە سلێمانی ناڕازین لە بەشێک لە مامۆستایان بەوەی نمرەی چالاکیی نێو پۆل بە هەوەس و بە کەمی بۆ قوتابییەکانیان دادەنێن، بەڕێوەبەری گشتیی پەروەردەی سلێمانیش دەڵێت تاوەکو ئێستا حاڵەتی سفر لە داتاکانیاندا تۆمار نەکراوە.

چیرۆکی سەرەکی: ژمارەیەک لە دایبابان لە سنووری پارێزگای سلێمانی نیگەرانی خۆیان لە شێوازی نمرەدانانی مامۆستایان دەربڕی و باس لەوە دەکەن کە ڕێنماییەکانی وەزارەتی پەروەردە پێشێل دەکرێن.

بەپێی ڕێنماییەکان، دەبێت هەر قوتابییەک بۆ ئامادەیی و ڕەوشت و پاکوخاوێنی لانی کەم شەش نمرە لە کۆی 10 نمرەی چالاکی وەربگرێت و چوار نمرەکەی تریش بۆ بەشداریی نێو پۆل بێت. 

زانیاریی بەدەستهاتوو: باوکێک بە نوێنەرایەتیی ژمارەیەک لە دایبابان بە ئاڤای ڕاگەیاند: مامۆستا هەیە تەنیا دوو بۆ سێ نمرەی بۆ قوتابی داناوە و هەندێکیشیان سفریان بۆ نووسراوە، ئەمەش کێشەی بۆ قوتابیانی پۆلی 12 دروست کردووە کە بۆ بەشداربوون لە تاقیکردنەوەکانی کۆتایی ساڵ پێویستیان بەو نمرانە هەیە.

لێدوانی فەرمی: نەژاد عەبدوڵڵا، بەڕێوەبەری گشتیی پەروەردەی سلێمانی لەسەر ئەم کێشەیە بە ئاڤای ڕاگەیاند: بەپێی ئەو داتایانەی لە سیستەمی پەروەردە لەبەردەستمانە، هیچ حاڵەتێکی وامان بەدی نەکردووە قوتابی سفری بۆ دانرابێت. ئەگەر هەر حاڵەتێکی وا هەیە، سوپاسی دایبابان دەکەین ئاگادارمان بکەنەوە و لە بەیانییەوە با سەردانمان بکەن، دەرگامان کراوەیە.