دادگا هۆشداری لە پێشێلکردنی دەستوور دەدات بۆ هەڵبژاردنی سەرۆکایەتیی پەرلەمان

ئاڤا نیوز

 

سەرۆکی ئەنجوومەنی باڵای دادوەری، جەخت لە پێویستیی پابەندبوون بە ماددە دەستوورییەکانی هەڵبژاردنی سەرۆک و جێگرانی پەرلەمان لە یەکەم دانیشتنی ئەنجوومەنەکەدا دەکاتەوە.

 

ئەوەی پێویستە بیزانیت: تەنیا پێنج ڕۆژ بۆ یەکەمین کۆبوونەوەی خولی نوێی پەرلەمانی عێراق ماوە و تائێستا کاندیدی سەرۆکی پەرلەمان کە بە گوێرەی نەریتی سیاسی دوای ساڵی 2003 پشکی سوننەکانە، یەکلایی نەکراوەتەوە.

 

چیرۆکی سەرەکی: چوارشەممە 2025-12-24، فایەق زێدان، سەرۆکی ئەنجوومەنی باڵای دادوەری پێشوازی لە عامر فایز، بە تەمەنترین ئەندامی پەرلەمان کرد، کە بڕیارە سەرۆکایەتیی یەکەم دانیشتنی پەرلەمانی لە 29ی ئەم مانگە بکات.

 

ڕاگەیێنراوی فەرمی: بەگوێرەی ڕاگەیێنراوی ئەنجوومەنی باڵای دادوەری، زێدان جەختی لە گرنگیی ڕێزگرتن و جێبەجێکردنی دەقە دەستوورییەکان بەبێ لێکدانەوەی بێ بنەما کردەوە. ناوبراو ئاماژەی بەوەدا کە ماددەکانی 54 و 55ی دەستوور، هەڵبژاردنی دەستەی سەرۆکایەتییان لە یەکەم دانیشتندا بە پێویست زانیوە.

 

ئاماژەی بەوەشدا. "هەر لێکدانەوەیەکی پێچەوانە، بە پێشێلکارییەکی ڕوونی دەستووری دادەنرێت و ڕێگە بۆ پێشێلکارییەکانی دیکە دەکاتەوە، کە ڕەنگە ڕێگر بێت لە پێکهێنانی دەسەڵاتەکانی یاسادانان و جێبەجێکردن لە وادە دیاریکراوە دەستوورییەکاندا".

 

ئەمەش بزانە: سەرۆککۆماری عێراق لە مەرسوومێکی کۆماریدا ڕۆژی 29ـی ئەم مانگەی وەک یەکەم دانیشتنی خولی نوێی پەرلەمانی عێراق دیار کرد، بەڵام تاوەکو ئێستا شیعە، سوننە و کورد نەگەیشتوونەتە ڕێککەوتن لەسەر دیاریکردنی کاندیدی پۆستەکانی سەرۆکوەزیران، سەرۆکی پەرلەمان و سەرۆککۆمار.