کاروان حەلاق مەقامێکی کوردی لە فێستیڤاڵێکی هۆڵەندا دەچڕێت

ئاڤا نیوز

هونەرمەندی تاراوگە، کاروان حەمید حەلاق، بە جلی ڕەسەنی کوردییەوە بەشداریی لە فێستیڤاڵێکی نێودەوڵەتی لە وڵاتی هۆڵەندا کرد و مەقامێکی تایبەت بە غەریبیی پێشکەش بە ئامادەبووان کرد.

چیرۆکی سەرەکی: کاروان حەلاق، ئەو هونەرمەندە کەرکووکییەی کە هەمیشە لە کۆنسێرت و چالاکییە هونەرییەکانیدا لە ئەوروپا و بەتایبەتی لە هۆڵەندا، بە جلی کوردی، کوڵەباڵ و شمشاڵەوە دەردەکەوێت؛ ئەمجارەش بە مەقام و بەستەیەکی کوردەواری، کلتووری کوردیی بە گەلانی جیهان ناساند و دەنگدانەوەیەکی زۆری هەبوو.

لێدوانی فەرمی: کاروان حەمید حەلاق بە ئاڤا نیوزی ڕاگەیاند: "ئەو شیعرەی لە فێستیڤاڵەکەدا خوێندمەوە، هەستی ناخی دڵم بووە و خۆم نووسیومە. تێکستەکە دەربارەی ئازارەکانی دوورەوڵاتییە و بڕوام وایە هەر کارێک بە ڕاستگۆیی و لە دڵەوە بێت، سەرکەوتوو دەبێت."