حکومەتی عێراق بە ڕێژەی 20٪  باج لەسەر پڕکردنەوەی باڵانس و ئینتەرنێت دادەنێت

ئاڤا نیوز

 

حکومەتی عێراق پلانی هەیە دووبارە باج لەسەر کارتی پڕکردنەوەی باڵانسی مۆبایل و خزمەتگوزارییەکانی ئینتەرنێت بسەپێنێتەوە، ئەمەش وەک بەشێک لە "پاکێجی چاکسازیی ئابووری" بە ئامانجی زیادکردنی داهاتەکانی دەوڵەت.

 

ئەوەی پێویستە بیزانیت: عێراق یەکێک لە گەورەترین قەیرانە داراییەکانی مێژووی هاوچەرخی خۆی بەسەر دەبات و ترسی نەتوانینی حکومەت بۆ دابینکردنی مووچەی فەرمانبەران و خانەنشینان زیادی کردووە. 

 

نووسراوی فەرمی: بەگوێرەی نووسراوێکی ئەنجوومەنی وەزیرانی عێراق، کە وێنەیەکی دەست ئاڤا میدیا کەوتووە لە کۆبوونەوەی هەفتەی ڕابردوویدا بڕیاری داوە بە پەسەندکردنی پێشنیازی ئەنجوومەنی وەزاری بۆ کاروباری ئابووری. یەکێک لەو پێشنیازانەش دووبارە سەپاندنەوەی کرێی خزمەتگوزارییە بە ڕێژەی 20٪ لەسەر پڕکردنەوەی باڵانسی مۆبایل و ئینتەرنێت، پڕکردنەوەکە چ بە کارت بێت یان لە ڕێگەی ئەپڵیکەیشنە ئەلیکترۆنییەکانەوە.

 

شێوازی جێبەجێکردن: وەزارەتی پەیوەندییەکان و دەستەی ڕاگەیاندن و گەیاندن بەرپرسن لە کۆکردنەوەی ئەو بڕە پارەیە و یەکلاکردنەوەی مانگانە لەگەڵ کۆمپانیاکانی پەیوەندی و ئینتەرنێت و خستنە ناو هەژماری وەزارەتی دارایی.

 

لەلایەکی دیکەوە: دوێنێ دووشەممە ئەنجوومەنی وەزاریی ئابووریی عێراق بەسەرۆکایەتیی محەممەد شیاع سوودانی کۆبووەوە، سوودانی لە کۆبوونەوەکە داوای کردووە کاریگەریی ڕێکارەکانی چاکسازی لەسەر دارایی گشتی دەستنیشان بکرێت، بەتایبەتی لە کەم کردنەوەی خەرجییەکان و زیادکردنی داهاتەکان. هەروەها جەختی لەسەر پێویستی جێبەجێکردنی چاکسازییە داراییەکان کردووەتەوە بۆ ڕێکخستنەوەی پێشینەکانی خەرجکردنی گشتی.

 

کاریگەری و لێکەوتەکان: زیادکردنی ئەو ڕێژەیە لەسەر پڕکردنەوەی باڵانسی مۆبایل و ئینتەرنێت، ئەگەر کۆمپانیاکانی گەیاندن لە ئەستۆی نەگرن، دواجار هاووڵاتیان باجەکەی دەدەن و ئەو بڕە پارەیە دەبێت ئەوان بیدەن.

 

ئەمەش بزانە: پێشووتر بڕیار %20ی باجی سەر كارتەكانی مۆبایل و ئینتەرنێت لە عێراق هەبوو بەڵام بە بڕیاری ئەنجوومەنی وەزیران لە ساڵی 2022 لابرا بەمەش نرخی كارتەكان لە سەرتاسەری عێراق كەم بوونەوە.