گومرگی هەولێر هاووڵاتیان ئاگادار دەکاتەوە: زوو سەردانمان بکەن

ئاڤا نیوز

بەڕێوەبەرایەتیی گومرگی هەولێر بەهۆی هەژماری کۆتایی ساڵ کاتی دەوامی کەم دەکاتەوە، داواش لەو کەسانە دەکات کە "مامەڵەی زۆر پێویستیان هەیە" زوو سەردانیان بکەن.

 

لێدوانی فەرمی: فایەق ئەحمەد، بەڕێوەبەری گومرگی هەولێر بە ئاڤا میدیای وت: ئاگاداری هاووڵاتیان دەکەینەوە، کە سبەی چوارشەممە هەژماری کۆتایی ساڵ دەکەین، ئەو کەسانەی کە مامەڵەی زۆر پێویستیان هەیە زوو سەردانمان بکەن، بۆ ئەوەی مامەڵەکانیان تەواو بکەین.

 

- کاتژمێر 11:00ی پێشنیوەڕۆ دەرگای گۆڕەپانەکەمان دادەخەین و ڕێگە بە هاتنە ژوورەوەی هیچ ئۆتۆمبێلێک نادەین، ئەو هاووڵاتیانەی لەنێو فەرمانگەکەن مامەڵەکانیان تەواو دەکرێت، دواتر هەژماری کۆتایی ساڵ دەکەین، چونکە دوایین ڕۆژی دەوامی فەرمییە.

 

زانیاریی زیاتر: لە ڕۆژانی ئاسایی کاتژمێر 08:00 دەوامی بەڕێوەبەرایەتیی گومرگی هەولێر دەست پێ دەکات، هاتنە ژوورەوەی ئۆتۆمبێلی گەورە بۆ نێو گۆڕەپانی بەڕێوەبەرایەتییەکە تاوەکو کاتژمێر 12:30 خولەکی نیوەڕۆ ڕێپێدراوە، هەروەها هاتنەژوورەوەی ئۆتۆمبێلی بچووکیش تا کاتژمێر 01:00ی پاشنیوەڕۆ ڕێگەپێدراوە.

 

ئەوەی پێویستە بیزانیت: ئەمڕۆ 23-12-2025، فەرمانگەی میدیا و زانیاریی حکومەتی هەرێمی کوردستان ڕایگەیاند، پشووی فەرمی لە سەرجەم دامودەزگاکانی هەرێم لە ڕۆژی پێنجشەممە 25-12-2025، بەبۆنەی سەری ساڵی نوێوە دەست پێ دەکات، تاوەکو ڕۆژی شەممە 03-01-2026، بەردەوام دەبێت.