فڕۆکەی سوپا سالاری لیبیا لە ئاسمانی تورکیا کەوتەخوارەوە و گیانی لەدەست دا

ئاڤا نیوز

فڕۆکەیەکی جۆری (فاڵکۆن 50) کە محەممەد حەداد، سوپاسالاری لیبیا و چوار کەسی دیکەی هەڵگرتبوو لە ئەنقەرەی پایتەختی تورکیا کەوتە خوارەوە و بەهۆیەوە هەموو سەرنشینەکان گیانیان لەدەست دا.

 

چیرۆکی سەرەکی: ئەمشەو سێشەممە ئاژانسی ڕۆیتەرز بڵاوی کردەوە فڕۆکەیەکی تایبەت کە حەدادی سوپاسالاری لیبیای دەگواستەوە، لە ئەنقەرە کەوتووەتە خوارەوە و نیشانەی ڕادیۆیی ون بووە.

 

لێدوانی فەرمی: سەرۆکوەزیرانی لیبیا گیانلەدەستدانی سوپاسالاری وڵاتەکەی بەهۆی تێکشکانی فڕۆکەکەی لە ئاسمانی ئەنقەرە پشتڕاست کردەوە.

 

-بەگوێرەی حکومەتی ڕزگاریی نیشتمانی لیبیا بەهۆی کەوتنەخوارەوەی ئەو فڕۆکەیە چوار بەرپرسی باڵا  و  وێنەگری سەرۆکایەتیی ئەرکانی لیبیا گیانیان لەدەستداوە:

 

1-محەممەد عەلی ئەحمەد حەداد، سوپاسالاری لیبیا.

2-فەریق ڕوکن فیتووری گەریبێل، سوپاسالاری هێزە وشکانییەکان.

3-عەمید مەحموود قەتیوی، بەڕێوەبەری دەزگای پیشەسازیی سەربازی.

4- محەممەد عەساوی، ڕاوێژکاری سوپاسالار.

5 محەممەد عومەر ئەحمەد مەحجووب، وێنەگر لە نووسینگەی ڕاگەیاندنی سەرۆکایەتی ئەرکانی گشتیی لیبیا.

 

هۆکارە زانراوەکان: بەگوێرەی میدیای تورکیا فڕۆکەکەی سوپاسالاری لیبیا دوای هەڵفرینی لە فڕۆکەخانە تووشی کێشەیەکی بچووکی کارەبایی  بووەتەوە و هەر ئەمەش بووەتە هۆی تێکشکانی.

 

ئەوەی لەبارەیەوە دەگوترێت: میدیاکانی لیبیا ئاشکرایان کردووە کە عەبدولحەمید دەبیبە، سەرۆکوەزیرانی لیبیا، "ژووری قەیران"ی پێکهێناوە بۆ پەیوەندیکردن لەگەڵ تورکیا سەبارەت بە ڕووداوەکە.

 

-وەزیری ناوخۆی تورکیا دیارنەمانی پەیوەندیی لەگەڵ فڕۆکەکە پشتڕاستکردەوە کە جگە لە حەداد، 4 کەسی دیکەی هەڵگرتبوو.

 

-فڕۆکەکەی حەداد لە کاتی گەشتکردن لە ئەنقەرەوە بۆ تەرابلوس کەوتووەتە خوارەوە و چارەنووسی سەرنشینەکانی نادیارە.

 

زانیاریی زیاتر: پێشتر حەداد لە ئەنقەرە لەگەڵ یاشار گولەر، وەزیری بەرگریی تورکیا، و سەلجوق بەیراکتار ئۆغڵو، سەرۆکی ئەرکان، گفتوگۆی لەبارەی هاریکاریی سەربازی بۆ لیبیا ئەنجامدابوو.