مەسرور بارزانی: پۆستی سەرۆککۆمار مافی پارتییە

ئاڤا نیوز

سەرۆکوەزیران مەسرور بارزانی دەڵێت: چۆن سوننەکان پۆستی سەرۆکی پەرلەمان بە گەورەترین هێز دەدەن و شیعەکانیش پۆستی سەرۆکوەزیران بە گەورەترین فراکسیۆن دەدەن، پێویستە گەورەترین هێزی کوردیش پۆستی سەرۆککۆمار وەربگرێت و پارتی یەکەمی هەموو عێراقە.

چیرۆکی سەرەکی: لە نوێترین چاوپێکەوتنی ڕۆژنامەوانی لەگەڵ کەناڵی سکای نیوزی عەرەبی، سەرۆکوەزیران مەسرور بارزانی تیشکی خستە بابەتە هەنووکەییەکانی ناوچەکە لەوانە؛ پۆستی سەرۆککۆمار، مەترسییەکانی داعش و پەیوەندی ئەمریکا لەگەڵ لایەنە سیاسییەکانی عێراق.

لێدوانی ڕۆژنامەوانی: سەرۆکوەزیران مەسرور بارزانی، لە دیدارێکدا لەگەڵ عیمادەدین ئەدیب لە کەناڵی "سکای نیوز"ـی عەرەبی ڕایگەیاند: هەڵبژادرنی سەرۆکوەزیرانی عێراق ئەرکی گەورەترین فراکسیۆنی شیعەیە و ئێمەش ڕێز لە ڕاو بڕیاریان دەگرین، چۆن سوننەکان پۆستی سەرۆکی پەرلەمان بە گەورەترین هێز دەدەن و شیعەکانیش پۆستی سەرۆکوەزیران بە گەورەترین فراکسیۆن دەدەن پێویستە گەورەترین هێزی کوردیش پۆستی سەرۆککۆمار وەربگرێت و پارتی دیموکراتی کوردستان یەکەمی هەموو عێراقە وەکو حیزب و د. فوئاد حوسێنی بۆ ئەو پۆستە کاندید کردووە.

ئاماژەی بەوەشکرد، وەکو کورد تاوەکو ئێستا نەگەیشتوونەتە ڕێککەوتن دەربارەی پۆستی سەرۆککۆمار دەمانەوێ لە پەرلەمانی کوردستانەوە تاکە کاندیدێک دیاریی بکرێت و یاخود پەرلەمانتارە کوردەکان لە بەغدا لە قۆناغی یەکەم دەنگ بە کاندیدێک بدەن دواتر ئەو کاندیدە لە پەرلەمانی عێراق وەکو سەرۆککۆمار هەڵبژێردرێت کە ئەمە عادیلانە دەبێت.

لەلایەکی دیکەوە: سەبارەت بە مووچەی فەرمانبەرانی هەرێمی کوردستان سەرۆکوەزیرانی هەرێمی کوردستان وتی: کورد دوایین کەسن مووچە وەردەگرن، بەکارهێنانی بودجە وەکو کارتێکی سیاسی کارێكی نادەستوورییە، کورد لە هەموو حکومەتەکان پێشوو هاووڵاتیی یەکسان نەبوون.

سەرۆکوەزیران مەسرور بارزانی ئەمانەشی وت:

٠ ڕووداوەکانی ئەم دواییەی سووریا و شکاندنی زیندانەکانی داعش چالاکی و هەڕەشەکانی داعشی زیاد کردووە و ئەو ژینگەیەی داعشی بەرهەم هێناوە هێشتا ماوە.

٠ هێشتا عێراق و هەرێمی کوردستان پێویستیان بە هێزەکانی ئەمریکا و هاوپەیمانان هەیە گەرچی بەغدا و واشنتن ڕێککەوتن لەسەر کشانەوەی ئەو هێزانە، بەڵام ئێمە پێمان وایە بوونی ئەمریکا پێویستە بۆ شەڕی دژی داعش کە لەسەر داوای هەموو عێراق هاتووەتە ئەو وڵاتە و پەیوەندییەکان لەگەڵ ئەمریکا گرنگن و پێویستە بە وریاییەوە مامەڵەی لەگەڵ بکرێت.

٠ ڕێککەوتنی ئەم دواییەی هێزەکانی سووریا دیموکرات(هەسەدە)  و حکومەتی دیمەشقی هەنگاوێکی دروست بوو بەرەو سەقامگیری. دەبێت کورد یەکسان بن و گەلی کوردیش مافی خۆیەتی باس لە ئامانج و مافە نەتەوەییەکانی بکات، کورد بوون کێشە نییە و خوا ئێمەی بە کورد دروست کردووە و نکوڵی لێناکرێت و لە هەر کوێیەک بم من کوردم و نایگۆڕم.