شێخ دارا: بارانی مسۆگەر لە سەرتاسەری هەرێمی کوردستان باریوە

ئاڤا نیوز

ئەو شەپۆلی بارانبارینەی ماوەی دوو ڕۆژە زۆربەی ناوچەکانی هەرێمی کوردستانی گرتووەتەوە تاوەکو شەممەی داهاتوو بەردەوام دەبێت، نزیکەی 400 ملم باران باریوە و ئەمەش ڕێژەیەکی بەرزە.

لێدوانی فەرمی: شێخ دارا، شارەزای کەشناسی و پێشکەشکاری کەشوهەوای ئاڤا وتی: لە زۆربەی ناوچەکانی هەرێمی کوردستان بارانی مسۆگەر باریوە، واتا گەیشتنە بەڕێژەی بەرزی دابارین بۆ گەنم و کشتوکاڵ. ئەمساڵ کوردستان لە هەموو ناوچەکان گەیشتووە بە بارانی مسۆگەر.

ئاماژەی بەوەشکرد، تاوەکو شەممە بارانبارین بەشێوەی پچڕ پچڕ هەیە، تەرزە و هەورە بروسکەش دەبێت، هەروەها بەیانیان و ئێواران ئەگەری تەم و مژ هەیە."

لەلایەکی دیکەوە: بەگوێرەی دوایین پێشبینییەکانی کەشناسیی هەرێمی کوردستان، ناسەقامگیریی کەشوهەوا لە ناوچەکەدا بەردەوام دەبێت و چاوەڕوان دەکرێت ئەو شەپۆلە بارانبارینە تاوەکو 14ـی ئەم مانگە بەردەوام بێت، لە ناوچە شاخاوییەکان بەفر دەبارێت و بەستەڵەک دروست دەبێت.

بەگوێرەی پێشنییەکان، پلەکانی گەرما لە نزمترین پلە بۆ بەرزترین پلە لە ناوچەکاندا بەمشێوەیە دەبێت:-

٠ هەولێر: یەک بۆ 10 پلە
٠ سلێمانی: 6 بۆ 8 پلە
٠ کەرکووک: 10 بۆ 12 پلە
٠ دهۆک: 2 بۆ 4 پلە
٠ هەڵەبجە: 7 بۆ 10
٠ سۆران: 3 بۆ 4 پلە
٠ زاخۆ: 8 بۆ 9 پلە
٠ ڕاپەڕین: 7 بۆ 9 پلە
٠ گەرمیان: 10 بۆ 13 پلە