شەپۆلێکی بارانبارین و سەرما هەرێمی کوردستان دەگرێتەوە

ئاڤا نیوز

پێشبینی دەکرێت لە ئەمڕۆوە شەپۆلێکی بارانبارین بە شێوەی نمەباران لە ناوچە جیاجیاکانی کوردستان دەستپێبکات، هاوکات لە کۆتایی ئەم مانگەشدا شەپۆلێکی بەهێزی بەفر و باران سەرتاسەری ناوچەکە بگرێتەوە و پلەکانی گەرما بە شێوەیەکی بەرچاو دابەزن.

وێنە گەورەکە: ئامارەکان دەریدەخەن کە ئەمساڵ بەراورد بە ساڵی ڕابردوو، بڕی بارانبارین لە زۆربەی ناوچەکانی هەرێمی کوردستان زیادی کردووە. چاوەڕوان دەکرێت ئەم وەرزە یەکێک بێت لە ساڵە پڕ بارانەکان و کاریگەریی ئەرێنی لەسەر ئاستی ئاوی ژێرزەوی و کەرتی کشتوکاڵ هەبێت.

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا، ڕایگەیاند: "لە ئەمڕۆوە کاریگەریی شەپۆلێکی دەریای سپی ناوەڕاست دەگاتە عێراق و هەرێمی کوردستان؛ سەرەتا بە نمەباران لە هەندێک ناوچە دەستپێدەکات، بەڵام ئەم شەپۆلە سەرەتاییە بەخوڕ نابێت."

- بەپێی پێشبینییەکانی شێخ دارا، لە ڕێکەوتی 27 و 28ی ئەم مانگەدا، شەپۆلی پێنجەمی بەفر و بارانبارین دەستپێدەکات و تاوەکو 2ی مانگی داهاتوو بەردەوام دەبێت. لەم شەپۆلەدا:

- پلەکانی گەرما دادەبەزن و خێرایی با زیاد دەکات.

- بەفر سەنتەری شار و شارۆچکەکان دەگرێتەوە.

- چاوەڕوان دەکرێت سەنتەری شارەکانی (هەولێر، سلێمانی و دهۆک) سپی پۆش بن.

زانیاریی کەشناسی: بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان ئاماژەی بەوە کردووە، ئەمڕۆ سێشەممە 23-12-2025، ئاسمان لە نێوان نیمچەهەور و هەوری تەواودا دەبێت. لە کاتەکانی شەودا ئەگەری نمەباران لە ناوچەکانی باشووری عێراق هەیە و پاشان کاریگەرییەکەی درێژدەبێتەوە بۆ پارێزگاکانی سلێمانی و کەرکووک، کە تاوەکو بەیانیی چوارشەممە بە شێوەیەکی لاواز بەردەوام دەبێت.

ئەمەش بزانە: خێرایی با: لە نێوان 10 بۆ 20 کیلۆمەتر لە کاتژمێرێکدا دەبێت، بە ئاراستەی باکووری ڕۆژئاوا.

-مەودای بینین: لە نێوان ٨ بۆ ١٠ کیلۆمەتردا دەبێت.

- بەرزترین پلەکانی گەرمای پێشبینیکراو: (هەولێر: 15، سلێمانی: 12، دهۆک: 13، زاخۆ: 14، کەرکووک: 16، هەڵەبجە: 14، سۆران: 11، گەرمیان: 17) پلەی سەدی.