لەمساڵدا نزیکەی 300 هەزار سەر ئاژەڵ هاوردەی هەرێمی کوردستان کراون

ئاڤا نیوز

بەپێی داتاکانی وەزارەتی کشتوکاڵ، لە ماوەی 11 مانگی ئەمساڵدا زیاتر لە 292 هەزار سەر ئاژەڵ لە جۆرەکانی مەڕ و گوێرەکە هاوردەی هەرێمی کوردستان کراون.

وێنە گەورەکە: بازرگانانی هەرێمی کوردستان لە وڵاتە جیاوازەکانی جیهانەوە ئاژەڵ هاوردە دەکەن؛ بەشێکی ئەم ئاژەڵانە بۆ پڕۆژەکانی بەخێوکردن و بەرهەمهێنانی شیر بەکاردەهێنرێن، بەشێکی دیکەشیان لە ڕێگەی کوشتارگەکانەوە سەردەبڕدرێن و گۆشتەکەیان دەخرێتە بازاڕەوە.

لێدوانی فەرمی: فیراس سدیق، بەڕێوەبەری سامانی ئاژەڵ لە وەزارەتی کشتوکاڵ بە ئاڤای ڕاگەیاند: "لە سەرەتای ئەمساڵەوە تاوەکو 30-11-2025، بەپێی ئەو مۆڵەتانەی بە بازرگانان دراون، نزیکەی 300 هەزار سەر ئاژەڵ هاوردە کراون کە زۆرینەیان گوێرەکەی نێر بوون."

ژمارەکان وا دەڵێن: ئامارە وردەکانی هاوردەکردنی ئاژەڵ بەم شێوەیەیە:

212,575 گوێرەکەی نێر.

72,510 کاوڕ و مەڕ.

7,204 گوێرەکەی مێ و مانگا.

زانیاریی زیاتر: ئەو ئاژەڵانە لە وڵاتانی (ئۆرۆگوای، بەرازیل، ئەرمینیا، ئازەربایجان و وڵاتانی ئەوروپا)ـەوە هێنراون. مەرجی سەرەکیی وەزارەتی کشتوکاڵ بۆ هاوردەکردن ئەوەیە کە دەبێت ئەو وڵاتانە لە ڕووی تەندروستییەوە پاک بن و هیچ جۆرە نەخۆشییەکی گوازراوەی ئاژەڵانیان تێدا نەبێت.