کامێرای "خاڵ بۆ خاڵ" لە ڕێگە سەرەکییەکانی گەرمیان دادەنرێت

ئاڤا نیوز

بەڕێوەبەرایەتیی هاتووچۆی گەرمیان دەستی بە جێبەجێکردنی پڕۆژەی دانانی کامێرای چاودێریی "خاڵ بۆ خاڵ" لە هەردوو ڕێگەی سەرەکیی (کەلار - کفری) و (کەلار - دەربەندیخان) کردووە، بە ئامانجی کەمکردنەوەی ڕووداوەکان.

وێنە گەورەکە: حکومەتی هەرێمی کوردستان لە چوارچێوەی پلانی ڕێکخستنەوەی هاتووچۆ و کەمکردنەوەی ڕووداوە دڵتەزێنەکان، پڕۆژەی کامێرای "خاڵ بۆ خاڵ" لە زۆربەی شەقام و ڕێگەوبانەکان جێبەجێ دەکات. ئەو ناوچانەی پێشتر کامێراکانیان لێ جێگیر کراوە، ڕووداوەکانی هاتووچۆ تێیاندا بە ڕێژەیەکی بەرچاو کەمی کردووە.

لێدوانی فەرمی: عەقید سامان عەلی، گوتەبێژی هاتووچۆی گەرمیان، بە ئاڤای ڕاگەیاند: "ڕێگەی سەرەکیی نێوان کەلار – کفری کە درێژییەکەی 43 کیلۆمەترە، کامێرای خاڵ بۆ خاڵی بۆ دادەنرێت. مەودای نێوان هەر دوو کامێرایەک 5 کیلۆمەتر دەبێت و بەرزترین خێرایی ڕێگەپێدراو لەم ڕێگەیەدا 100 کیلۆمەتر لە کاتژمێرێکدا دەبێت."

ئەوەی ئێستا ڕوودەدات: پڕۆسەی دانانی کامێراکان لە ڕێگەی کەلار - کفری دەستی پێکردووە، بەڵام بەهۆی بارانبارینەوە کارەکان بە شێوەیەکی کاتی ڕاگیرابوون؛ بڕیارە لە ئایندەیەکی نزیکدا کارەکان دەست پێ بکەنەوە و تاوەکو مانگی 3ی ساڵی داهاتوو تەواو بکرێن.

بۆچی گرنگە: بەپێی هەڵسەنگاندنە زانستییەکانی هاتووچۆی گەرمیان، پێشبینی دەکرێت دوای کەوتنەکاری ئەم کامێرایانە، ڕووداوەکانی هاتووچۆ لەو ڕێگەیەدا بە ڕێژەی 80% کەم ببنەوە.

هەنگاوی داهاتوو: گوتەبێژی هاتووچۆی گەرمیان ئاماژەی بەوەش کرد، دوای ئەوەی حکومەتی هەرێمی کوردستان ڕێگەی سەرەکیی کەلار – دەربەندیخان بە فەرمی وەربگرێت، کامێرا لەو ڕێگەیە وەک قۆناغی دووەم جێگیر دەکرێن؛ بۆ ئەم مەبەستەش تەنیا چەند ڕێکارێکی کارگێڕی ماون و کاریان لەسەر دەکرێت.