سوودانی: گواستنەوەی زیندانیانی داعش لە سووریاوە بڕیارێکی سەربەخۆی عێراقە

 ئاڤا نیوز

سەرۆکوەزیرانی عێراق ڕایدەگەیێنێت، گواستنەوەی چەکدارانی داعش لە سووریاوە بۆ ناوخۆی وڵات بڕیارێکی نیشتمانییە و ئامانج لێی پاراستنی ئاسایشی عێراق، ناوچەکە و جیهانە لە مەترسییەکانی تیرۆر.

چیرۆکی سەرەکی: ئەمڕۆ، لە بەغدا، محەممەد شیاع سوودانی، سەرۆکوەزیرانی عێراق پێشوازی لە ماهر سالم تەمیمی، باڵیۆزی ئوردن لە بەغدا کرد، سوودانی ئاماژەی بەوەدا، پرۆسەی گواستنەوەی زیندانیانی داعش لە سووریاوە بۆ عێراق بۆ ڕێگریکردنە پشێوییەکانی ناوچەکە. 

ڕاگەیێنراوی فەمی: نووسینگەی سەرۆکوەزیرانی عێراق لە ڕاگەیێنراوێکدا دەڵێت: سەرۆکوەزیران محمەممەد شیاع سوودانی و ماهر سالم تەمیمی، باڵیۆزی ئوردن لە بەغدا، باسیان لە پەرەپێدانی پەیوەندییەکان و بەهێزکردنی هاریکاریی سێقۆڵیی نێوان عێراق، ئوردن و میسر کرد بۆ چەسپاندنی ئارامی لە تەواوی ناوچەکەدا.

بەگوێرەی ڕاگەیێنراوەکە، سوودانی داوای لە وڵاتانی جیهان کردووە هاوکاری بن بۆ ئەوەی بەزوویی هاووڵاتییە تووندڕەوەکانی خۆیان لە عێراق وەربگرنەوە.

٠ پێداگیرین لە پاراستنی یەکپارچەیی خاکی سووریا.

٠ بڕیارەکانی ئیسرائیل بۆ فراوانکردنی نیشتەجێبوون لە کەناری ڕۆژئاوا بە تووندی سەرکۆنە دەکەین.

ئەمەش بزانە: باڵیۆزی ئوردن، ستایشی ڕۆڵی عێراق کرد لە پاراستنی ئاسایشی ناوچەکە، ئامادەیی وڵاتەکەشی نیشاندا بۆ هاوکاریکردن لە دۆسیەی گواستنەوەی زیندانییەکان و جێگیرکردنی سەقامگیری لە ڕۆژهەڵاتی ناوەڕاست.