ڕووسیا: فشارەکانی ئەمریکا بۆ سەر ئەوروپا و ئۆکرانیا داخوازییەکانی ڕووسیا بەدی ناهێنێت

ئاڤا نیوز

سەرەڕای بەردەوامبوونی هەوڵەکانی ئاشتی نێوان ڕووسیا و ئۆکرانیا، بەڵام وەزیری دەرەوەی ڕووسیا جەخت لەوە دەکاتەوە گفتوگۆکانیان لەگەڵ ئۆکرانیا پێویستی بە ڕێگایەکی دوور و درێژە. 

وێنە گەورەکە: شەڕ و ئاڵۆزییەکانی نێوان ڕووسیا و ئۆکرانیا بەردەوامی هەیە، لە کاتێکدا هەردوو لایەن چەندین کۆبوونەوە و گفتوگۆی ڕاستەوخۆیان لەبارەی ڕاگرتنی جەنگی نێوانیان کردووە، بەڵام سەرەڕای هەوڵە نێوەندگیرییەکان لەلایەن ئەمریکاوە، کەچی ڕووسیا ڕاگرتنی ئەو شەڕە بە ئاسان نازانێت.

لێدوانی فەرمی: سێرگی لاڤرۆڤ، وەزیری دەرەوەی ڕووسیا ڕایگەیاند: فشارەکانی دۆناڵد ترەمپ، سەرۆکی ئەمریکا بۆ سەر ئەوروپا و ئۆکرانیا پەبێی پێویست هاندەر نیین، ئەمەش وەک ئاماژەیەک کە ئەم فشارانە ئەنجامی داخوازی ڕووسیا لە دانوستانەکانی ئاشتی لەگەڵ ئۆکرانیا بەدی ناهێنن.

لاڤرۆڤ، دەشڵێت: "لەبارەی دانوستاندنەکان بۆ 'گفتوگۆی ئاشتی' لەگەڵ ئۆکرانیا، هێشتا لەبەردەم ڕێگایەکی زۆر دوور و درێژداین."

لەلایەکی دیکەوە: دۆناڵد ترەمپ، سەرۆکی ئەمریکا ڕایگەیاند: گەشبینی خۆی بۆ گەیشتن بە چارەسەرێک لەنێوان ڕووسیا و ئۆکرانیا دەربڕی و جەختی لەوەش کردەوە کە دەکرێت "بەم نزیکانە شتێک ڕووبدات، چونکە پێشکەوتنی باش لەدانوستانەکاندا بەدەستهاتووە."

زانیاریی زیاتر: ئەم لێدوانەی لاڤرۆڤ لەکاتێکدایە، ڕووسیا و ئۆکرانیا بەنێوەندگیری ئەمریکا لە ئەبوزەبی دوو خولی دانوستانی ڕاستەخۆیان ئەنجامداوە، سەرەڕای ئەوەی هەرسێ لایەنی ئەمریکیی و ڕووسی و ئۆکرانیی گفتوگۆکانیان بەئەرێنی و بەرهەمدار وەسف کردووە، بەڵام ‌‌تا ئێستا کۆمەڵێک بەربەست هەن کە ڕێگریی لە هەردوو لایەن دەکەن بۆ گەشتنیان بە ڕێککەوتنێک کە بتوانێت کۆتایی بەشەڕی چوارساڵەی نێوان مۆسکۆ و کێیڤ بهێنێت.