کانتۆنی جەزیرە دەرفەتێکی نوێ بۆ قوتابییە ئاوارەکان دەڕەخسێنێت

ئاڤا نیوز

دەستەی پەروەردە و فێرکردن لە کانتۆنی جەزیرە بڕیاری دا ئەزموونێکی تایبەت بۆ ئەو قوتابییە ئاوارەبووانە ئەنجام بدات کە بەهۆی شەڕەوە لە خوێندن دابڕاون، تاوەکو بتوانن قۆناغەکانی ناوەندی و ئامادەیی بە فەرمی تەواو بکەن.

ڕاگەیێنراوی فەرمی: بەگوێرەی ڕاگەیێنراوێکی دەستەی پەروەردە و فێرکردن لە کانتۆنی جەزیرە، ئەو قوتابییە ئاوارەبووانەی لە ساڵی 2018ـەوە نیشتەجێی ناوچەکەن، دەتوانن لە تاقیکردنەوەیەکی پێوانەیی بۆ هەردوو قۆناغی ناوەندی و ئامادەیی بە شێوەیەکی فەرمی و یاسایی بەشداری بکەن.

٠ لیژنەی پەروەردە لە قامیشلۆ ڕایگەیاند، پڕۆسەی ناونووسین لە 10ـی شوبات دەستپێدەکات و تاوەکو 17ـی هەمان مانگ لە باڵەخانەی لیژنەی فێرکردن لە ناو شاری قامیشلۆ بۆ پێشوازیکردن لە قوتابییان بەردەوام دەبێت.

زانیاریی زیاتر: دەستەی پەروەردە جەختی کردەوە، تاقیکردنەوەکە لە 28ـی شوبات ئەنجام دەدرێت و پێویستە پێشکەشکاران چوار وێنە، ناسنامە، بڕوانامەی پۆلی نۆ و ڕسووماتی 10 هەزار لیرەی سووری وەک ڕێکارێکی کارگێڕی لەگەڵ خۆیان بهێنن.

٠ ئیدارەی کانتۆنی جەزیرە ئاماژەی بەوە کرد، ئەم هەنگاوە بۆ قەرەبووکردنەوەی ئەو قوتابییانەیە کە بەهۆی بارودۆخی سەخت و دەربەدەریی بەردەوام، لە چەند ساڵی ڕابردوودا لە مافی سەرەتایی خوێندن لە ناوچەکەدا بێبەش کرابوون.