دەستەی حەج داوا دەکات پێدانی دۆلار ئەو حاجییانەش بگرێتەوە کە بە وشکانی گەشت دەکەن

ئاڤا نیوز

دەستەی باڵای حەج و عومرەی عێراق داوا لە بانکی ناوەندی دەکات، ئەو حاجی و عومرەکارانەی لە ڕێگەی وشکانییەوە گەشت دەکەن، هاوشێوەی گەشتیارانی ئاسمانی دۆلاریان بە نرخی بانکی پێبدرێت.

ڕاگەیێنراوی فەرمی: دەستەی باڵای حەج و عومرەی عێراق، لە ڕاگەیێنراوێکدا داوایەکی ئاراستەی بانکی ناوەندی کردووە، بۆ ئەوەی ئەو حاجی و عومرەکارانەی لە ڕێگەی وشکانییەوە دەچن بۆ سعوودیە، هاوشێوەی گەشتیارانی ئاسمانی دۆلاریان بە نرخی فەرمی پێ بدرێت.

٠ دەستەی حەج لە ڕاگەیەندراوەکەدا ئاماژەی بەوە کردووە، ئەم هەنگاوە لەپێناو هاوکاریی دارایی و بارسووکیی ئەو حاجی و عومرەکارانەیە کە دەیانەوێت لە ڕێگەی دەروازەی سنووریی "عەرعەر"ەوە گەشت بکەن.

زانیاریی زیاتر: هەروەها ئەوەشی خستووەتە ڕوو کە بە نووسراوێکی فەرمی داوایان لە بانکی ناوەندی کردووە چەند شوێنێک دیاری بکات بۆ پێدانی پشکی دۆلار بەو کەسانەی بە وشکانی دەچنە ماڵی خودا، تاوەکو ئەوانیش وەک ئەو گەشتیارانەی لە ڕێگەی فڕۆکەخانەکانەوە گەشت دەکەن، سوودمەند بن.

ئەوەی پێویستە بیزانیت: پێشتر وەزارەتی حەج و عومرەی سعوودیە، دەستەی حەجی عێراقی ئاگادار کردبووەوە کە ڕێژەی حاجیانی وشکانی بە ڕێژەی 10٪ کەم دەکرێتەوە و دەگۆڕدرێن بۆ گەشتی ئاسمانی. هەروەها بڕیار دراوە کە پاسی عێراقی نەچێتە ناو شاری مەککەوە، بەڵکو حاجییەکان لە دەروازەکانی شارەکە دادەبەزێنرێن و بە پاسی تایبەتی سعوودی دەگوازرێنەوە بۆ ناو شار.

لە لایەکی دیکەوە: سعوودیە جەختی کردووەتەوە کە چوونە ناو مەککە و شوێنە پیرۆزەکان تەنیا بۆ ئەو کەسانەیە کە ڤیزای فەرمیی حەجیان هەیە، داواشی لە لایەنە پەیوەندیدارەکان و کۆمپانیاکانی گواستنەوە کردووە پابەندی ڕێنمایییەکان بن.