تەمویلی مووچەی مانگی یەک خرایە سەر هەژماری بانکی وەزارەتی دارایی هەرێمی کوردستان

ئاڤا نیوز

وەزارەتی دارایی عێراق، 931 ملیار و 257 ملیۆن دیناری وەک مووچەی مانگی یەکی مووچەخۆرانی هەرێمی کوردستان خستە سەر هەژماری بانکیی وەزارەتی دارایی و ئابووریی هەرێمی کوردستان و بڕیارە سبەی دەست بە دابەشکردنی مووچە بکرێت.

چیرپکی سەرەکی: پێشنیوەڕۆی ئەمڕۆ سێشەممە، ڕێککارەکانی خەرجکردنی مووچەی مووچەخۆرانی هەرێمی کوردستان لە وەزارەتی دارایی عێراق تەواو کران و دەستبەجێ پارەکە خرایە سەر هەژماری بانکیی وەزارەتی دارایی و ئابووریی هەرێمی کوردستان. بەڵام بەهۆی ئەوەی دەوامی بانکی ناوەندی تاوەکو کاتژمێر سێیە، وەزارەتی دارایی و ئابووریی هەرێمی کوردستان فریا نەکەوت ڕێککارەکانی وەرگرتنی پارەکە جێبەجێ بکات، بۆیە سبەی دەست بە دابەشکردنی مووچە دەکرێت.

زانیاریی تایبەت: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای ڕاگەیاند: نزیکەی 931 ملیار و 257 ملیۆن دینار بە شەش قەید، وەک تەمویلی مووچەی مانگی یەکی مووچەخۆرانی هەرێمی کوردستان خراوەتە سەر هەژماری بانکیی وەزارەتی دارایی؛ لیستی مووچە بڵاودەکەینەوە و لە ماوەی سێ ڕۆژدا سەرجەم مووچەخۆران مووچەکانیان وەردەگرن.

لەلایەکی دیکەوە: مووچەی 63٪ی مووچەخۆران بۆ ئەم مانگە بە دیجیتاڵی دەبێت و نزیکەی 700 هەزار مووچەخۆر لە ڕێگەی "هەژماری من"ەوە مووچەی مانگی یەک وەردەگرن.