فازڵ نەبی: مووچەی مانگەکانی 11 و 12 لەمساڵدا خەرج ناکرێن

ئاڤا نیوز

بریکاری پێشووتری وەزارەتی دارایی عێراق ڕایدەگەیەنێت، لەم چەند ڕۆژەی لە ساڵی 2025 ماوە تەنیا مووچەی مانگی 10 خەرج دەکرێت و بۆ نەفەوتانی مووچەی مانگەکانی 11 و 12ـەش پێویستە بخرێنە سەر بودجەی ساڵی نوێ.

وێنە گەورەکە: یەکێک لە گەورەترین ئاڵێنگارییەکانی ئێستای نێوان هەولێر و بەغدا، پرسی شایستە داراییەکانی مووچەخۆرانە. هەرێمی کوردستان سەرجەم مەرجە یاساییەکانی جێبەجێ کردووە، بەڵام بەغدا بە بیانووی جیاواز ناردنی مووچەی سێ مانگی کۆتایی ساڵی دواخستووە، ئەمەش وای کردووە مەترسیی فەوتانی مووچەی دوو مانگی کۆتایی دروست بێت.

لێدوانی فەرمی: فازڵ نەبی، بریکاری پێشووتری وەزارەتی دارایی عێراق لە میانی بەشداریکردنی لە بەرنامەی "گفتوگۆی ڕۆژ"ی ئاڤا نیوز ڕایگەیاند: "لەو چەند ڕۆژەی لەمساڵدا ماوە، مووچەی مانگەکانی 11 و 12 خەرج ناکرێن؛ تەنیا مووچەی مانگی 10 خەرج دەکرێت و چەند ڕێکارێکی کەم ماون کە چاوەڕوان دەکرێت لە هەفتەی داهاتوودا تەواو بن."

چارەسەری پێشنیارکراو: فازڵ نەبی ئاماژەی بەوە کرد، بۆ چارەسەرکردنی گرفتی ئەو دوو مووچەیە، پێویستە شاندی دانوستانکاری هەرێمی کوردستان لەگەڵ بەغدا گفتوگۆ بکەن تاوەکو ئەو شایستانەی لای بەغدا ماونەتەوە، بخرێنە سەر بودجەی ساڵی 2026 و تەرخانکراوی داراییان بۆ دەستەبەر بکرێت.

پابەندییە یاساییەکان: فازڵ نەبی جەختی لەوە کردەوە کە حکومەتی هەرێمی کوردستان سەرجەم پابەندییەکانی لە یاسای بودجەدا جێبەجێ کردووە؛ وتیشی: "ڕادەستکردنی نەوت، داهاتی نانەوتی و سەرجەم بڕگەکانی خاڵی 12 لە یاسای بودجە جێبەجێ کراون، بەڵام وەزارەتی دارایی عێراق بەپێی بڕگەی (هـ) لەو خاڵە، پابەندی دابینکردنی پشکی هەرێم نەبووە."

- بریکاری پێشووتری وەزارەتی دارایی عێراق ئاماژەی بەوە دا کە نابێت ڕێککەوتنی هەرێمی کوردستان لەگەڵ لایەنەکانی عێراق تەنیا بە زارەکی بێت، بەڵکو دەبێت هەموو داواکاری و شایستەکان بە شێوەی نووسراوی فەرمی لە بودجەی ساڵی نوێدا بچەسپێنرێن.