هۆشداری لە پیسبوونی بەنداوی خاسە دەدرێت

ئاڤا نیوز

لافاو هەزاران دەبەی ئاو و پاشماوەی پیسی لەگەڵ خۆیدا هێناوە و لەنێو بەنداوی خاسەدا کۆی کردوونەتەوە. ژینگەپارێزێکیش هۆشداری لە پیسبوونی بەنداوەکە دەدات و دەڵێت: "ئەم پیسییە دەبێتە هۆی زیان گەیاندن بە سروشتی بەنداوەکە و ماسییەکان".

وێنە گەورەکە: هەزاران دەبەی ئاو و پاشماوەی خەڵک، بەهۆی بارانبارین و لافاوی چەند ڕۆژی ڕابردوو کە هەرێمی کوردستانی گرتەوە، لە لێواری بەنداوی خاسە لە پارێزگای کەرکووک کۆبوونەتەوە؛ بەو هۆیەوە ژینگەی بەنداوەکە پیس بووە و سیمایەکی ناشیرینی بە ناوچەکە بەخشیوە.

زانیاریی پەیامنێر: ئارام جەمال، پەیامنێری ئاڤا لە کەرکووک ڕایگەیاند: لە بەردەم بەنداوەکەدا هەزاران دەبەی ئاو و پاشماوەی هاووڵاتییان کۆبوونەتەوە، بەمەش ژینگەی لێواری بەنداوەکە بە تەواوی پیس بووە.

- باس لەوەش دەکرێت کە ڕێکخراوەکانی ژینگەپارێزی و لایەنە پەیوەندیدارەکانی حکومەت، بەبەردەوامی هەڵمەتی پاککردنەوە بۆ بەنداوەکە ئەنجام دەدەن، بەڵام بەداخەوە ئەو کەسانەی بە مەبەستی گەشتکردن سەردانی شوێنەکە دەکەن، بەشێکیان هیچ گرنگی بە پاکوخاوێنی و سروشتی ناوچەکە نادەن.

لێدوانی فەرمی: لەمبارەیەوە شکۆفە ساڵەیی، ژینگەپارێز بە ئاڤا میدیای ڕاگەیاند: "جێگەی نیگەرانییە کە هەندێک لە هاووڵاتییان، چ بە مەبەستی گەشتکردن بێت یان ماسیگرتن، ئەم زبڵ و خاشاک و پیسییە لە دوای خۆیان جێ دەهێڵن". 

- ئەم ژینگەپارێزە هۆشداریش دەدات لەوەی کە دواجار ئەو پیسییە دەبێتە زیان بۆ ئەو ماسییانەی لەناو ئاوی بەنداوەکەدا دەژین.

بەنداوی خاسە بە دووریی 10 کیلۆمەتر دەکەوێتە باکووری ڕۆژهەڵاتی پارێزگای کەرکووک، لە ساڵی 2006 بڕیاری دروستکردنی درا و لە ساڵانی 2010 و 2011 دەست بە بنیاتنانی کرا. بەنداوەکە سەرچاوەیەکی گرنگی ئاوی کشتوکاڵییە بۆ ناوچەکە، لە هەمان کاتدا شوێنێکی گەشتیارییشە.