گۆرانییەکی هونەرمەند هۆمەر دزەیی بە ژیریی دەستکرد نوێ دەکرێتەوە

ئاڤا نیوز

هونەرمەندێکی ڕۆژهەڵاتی کوردستان گۆرانی "بریندار" ـی هونەرمەندی گەورەی کورد هۆمەر دزەیی، نوێ دەکاتەوە، ڤیدیۆ کلیپەکەی بە ژیریی دەستکرد و ئاوازی گۆرانییەکەش بە شێوازی موزیکی جاز بەرهەم هاتووە.

چیرۆکی سەرەکی: یەکێک لە گۆرانییە کوردییە جوانەکان، گۆرانی"بریندار"ـە، بە "چەندی گەڕام لە شاران" ناسراوە، ئەو گۆرانییە کوردییە، لە ڕۆژهەڵاتی کوردستان بە شێوازێکی مۆدێرن و سەردەمیانە کاریی لەسەرکراوە، پێدرام شەهلایی، لەسەر شێوازی موزیکی جاز، ئەم گۆرانییەی نوێکردووەتەوە و دیاکۆ گەرمیانی بە ژیریی دەستکرد ڤیدیۆ کلیپەکەی بۆ بەرهەمهێناوە.

زانیاریی زیاتر: گۆرانییەکە لە هەژماری یوتیوبی "ڕۆژاز" بڵاوبووەتەوە، لەسەر گۆرانییەکەش نووسیویانە، ئەم پرۆژەیە لە ژێر ناوی ڕۆجازە کە هەوڵێکە بۆ تێکهەڵكێشکردنی گۆرانییە نۆستاڵژییەکان و یەکێک لە فۆرمەکانی مۆسیقای جاز.