ژمارەی ئەو عێراقییانەی لە ڕیزەکانی سوپای ڕووسیا شەڕ دەکەن ئاشکرا دەکرێت

ئاڤا نیوز

ڕاوێژکاری سەرۆکوەزیرانی عێراق ڕایدەگەیێنێت، نزیکەی پێنج هەزار هاووڵاتی عێراقی لە سوپای ڕووسیا وەرگیراون و بەغدا بە وردی چاودێری پرسەكە دەكات.

وێنە گەورەکە: ماوەیەکە ژمارەیەک هاووڵاتی عێراق کە بەشێکیان وەک خۆیان دەڵێن "هەڵخەڵەتێنراون"، بەڕێگای جیاواز و بەبێ ویستی خۆیان خراونەتە ناو سوپای ڕووسیا بۆ شەڕ دژی بە سوپای ئۆکراینا، براونەتە هێڵی پێشەوەی شەڕی نێوان ئەو دوو وڵاتە.

لێدوانی فەرمی: حوسێن عەلاوی، ڕاوێژکاری سەرۆکوەزیرانی عێراق، لە لێدوانێکی ڕۆژنامەوانیدا ڕایگەیاند، بەغدا بە وردی بەدواداچوون بۆ وەرگرتنی هاووڵاتیانی عێراقی لە سوپای ڕووسیا دەکات. ئاماژەی بەوەدا نزیکەی پێنج هەزار عێراقی لە سوپای ڕووسیا وەرگیراون و عێراق لەگەڵ مۆسکۆ ڕێکاری پێویست دەگرێتەبەر بۆ ڕێگریکردن لە وەرگرتنی زیاتری هاووڵاتیانی.

کاریگەریی و لێکەوتەکان: سەرۆکی ئەنجوومەنی باڵای دادوەریی عێراق، هۆشداریی دایە ئەو عێراقییانەی بۆ شەڕ دەچنە پاڵ سوپای وڵاتانی دیکە و دووپاتی کردەوە کە یاسای عێراق سزای زیندانیکردنی بۆ هەر کەسێک دیاری کردووە کە بەبێ مۆڵەتی فەرمی حکومەت، پەیوەندی بە هێزە چەکدارەکانی وڵاتێکی دیکەوە بکات.

ئەوەی پێویستە بیزانیت: ڕاپۆرتە ڕۆژنامەوانییەکان باس لە بوونی هەزاران عێراقی دەکەن کە بۆ شەڕکردن لە ڕیزەکانی هێزەکانی ڕووسیا و ئۆکراینا دامەزراون، سێ هەزاریان لەگەڵ سوپای ڕووسیا و دوو هەزاریشیان لەگەڵ سوپای ئۆکراینان.